Í faðmi Fjallabaks
- Lýsing
Í þessari ferð hafa þátttakendur bækistöð í skála Ferðafélags Íslands í Hvanngili og fara þaðan í rannsóknarleiðangra um lítt þekkta afkima á Fjallabaki. Þátttakendur ferðast saman á staðinn með allan farangur í rútu frá Reykjavík.
- Brottför/Mæting
- kl.16 með rútu frá Reykjavík.
- Fararstjórn
- Innifalið
- Rúta, gisting og farastjórn.
Búnaður
Pakkað fyrir trússferð eða bækistöðvarferð
Í trússaðri ferð er farangur fluttur á milli náttstaða svo aðeins þarf að bera nauðsynlegan búnað fyrir einn dag í einu í léttum dagpoka. Mat, svefnpoka og tilheyrandi er pakkað ofan í trússtösku og flutt í náttstað, sem getur ýmist verið tjaldstæði eða skáli.
Þó að ekki þurfi í trússferðum að skera allan útbúnað niður eins og þegar gengið er með allt á bakinu þá er nauðsynlegt að pakka naumt. Oftast er takmarkað pláss í trússbílum og bátum og pökkun þarf að taka mið af því.
Bækistöðvaferð er svipuð trússferðum en þá er gengið með dagpoka út frá sama náttstað allan tímann, tjaldi eða skála. Í bækistöðvaferðum er farangur ekki trússaður á milli náttstaða og hægt að vera enn frjálslegri í pökkun en í trússferðunum.
Athugið að listinn hér að neðan er ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar og hvort sofið er í skála eða tjaldi. Ef gengið er á milli skála eða dvalið í skála, þá má þar oftast finna eldunaraðstöðu og matarílát auk salernis eða kamars með klósettpappír.
Göngufatnaður
- Góðir gönguskór og mjúkir göngusokkar
- Nærföt, ull eða flís, eftir veðri
- Peysa úr ull eða flís
- Göngubuxur / stuttbuxur
Í dagpokanum
- Bakpokahlíf / plastpoki inni í bakpokanum
- Áttaviti, landakort og GPS tæki
- Smurt nesti fyrir daginn
- Göngunasl svo sem þurrkaðir ávextir, súkkulaði og hnetur
- Vatnsbrúsi
- Hitabrúsi með kakói, tei eða kaffi
- Göngustafir
- Myndavél og kíkir
- Sólgleraugu
- Sólarvörn og varasalvi
- Hælsærisplástur, plástur, teygjubindi og verkjalyf
- Salernispappír, blautþurrkur og litlir plastpokar fyrir notaðan pappír
- Húfa, vettlingar og buff um hálsinn
- Vind- og vatnsþéttur hlífðarfatnaður
- Legghlífar, vaðskór og broddar, ef þurfa þykir
Í trússtöskunni
- Svefnpoki og lítill koddi
- Bolur til skiptana og til að sofa í
- Auka nærbuxur og sokkar
- Höfuðljós
- Tannbursti og tannkrem
- Sápa / sjampó
- Lítið handklæði
- Eyrnatappar
- Skálaskór
- Peningar
- Núðlur eða pasta í pokum
- Pulsur eða foreldaðar kjúklingabringur
- Eitthvað gott á grillið
- Kol og uppkveikilögur
- Haframjöl
- Brauð og flatkökur
- Smjör og álegg, svo sem ostur, kæfa, hangikjöt
- Hrökkbrauð og kex
- Þurrkaðir ávextir, súkkulaði og hnetur
- Kakó, te og/eða kaffi
- Súpur
- Krydd, t.d. salt og pipar
Ef sofið er í tjaldi þarf að auki í trússtöskuna
- Tjald og tjalddýna
- Prímus og eldsneyti
- Eldspýtur
- Pottur
- Hitabrúsi og drykkjarbrúsi
- Diskur og drykkjarmál
- Hnífapör
- Vasahnífur / skæri
- Viðgerðasett, nál og tvinni, snæri og klemmur
Leiðarlýsing
1.d., föstud. Brottför úr Reykjavík kl. 16. Ekið um Suðurland og inn Fljótshlíð sem leið liggur í Hvanngil. Áætluð koma þangað er um kl. 19. Hópurinn kemur sér fyrir í skálanum og tekur létta kvöldgöngu um kvöldið.
2.d. Eftir morgunmat er haldið af stað í leiðangur inn Hvanngil milli Ófæruhöfða og Útigönguhöfða á svæði sem kallast "fyrir norðan Höfða." Þaðan liggur leiðin upp í fjöllin að brúnum og þaðan austur að Einstigisgili. Svo förum við meðfram Mangagili niður í Kaldaklof, suður með Einstigsfjalli og Sléttafelli og eftir svokölluðum Strútsstíg gegnum Hvanngilshnausa aftur í Hvanngil. Stórbrotið landslag og fáfarnar slóðir að mestu á slóðum sauðkindarinnar. Vegalengd um 20 km og 700 metra hækkun.
3.d. Eftir morgunmat er haldið úr skála meðfram Kaldaklofskvísl til norðurs, yfir Bratthálskvísl og gengið á Brattháls og eftir honum endilöngum meðfram Álftavatni. Síðan niður Klámbrekku og vestur sanda að Torfahlaupi í Markarfljóti.
Þaðan er haldið til baka að Bratthálsi í Stígsver og þar skal vaðið yfir Kaldaklofskvísl og gengið um skörð og gil vestan við Stórusúlu og hálfhring um fjallið aftur í Hvanngil. Vaða þarf þrisvar sinnum yfir daginn.Vegalengd 17 km og ca. 300 metra hækkun.
4.d. Eftir morgunmat taka menn saman farangur sinn og skilja hann eftir í Hvanngili í góðu skipulagi. Hópurinn gengur suður sanda, yfir Innri-Emstruáá brúnni og stefnir á Stórkonufell. Gengið verður á fjallið sem mjög fáir hafa gert. Síðan haldið niður á sand aftur og við Útigönguhöfða tekur rútan hópinn um kl. 14.00 en hefur áður farið í Hvanngil og tekið farangur okkar. Vegalengd 11 km og 300 metra hækkun.
Ekið til Reykjavíkur með stuttum stoppum á áhugaverðum stöðum. Komið til Reykjavíkur um kl. 18.
