Ferð: Eyjafjallajökull þveraður

Suðurland
Eyjafjallajökull þveraður
Óviðjafnanlegt útsýni og frábærar fjallaskíðabrekkur
Ert þú félagsmaður í FÍ Nei
Lýsing

Ekið austur að Eyjafjallajökli. Helmingur bíla skilinn eftir norðan megin jökulsins, rétt vestan við Gígjökul. Haldið að því búnu að Seljavallalaug.

Þaðan er gengin Seljavallaleið upp á jökulinn, fyrst með skíðin á bakpokanum en síðan eru skinn sett undir skíðin.

Gengið á Hámund og Guðnastein og eftir hájöklinum að Goðasteini. Þaðan er skíðuð niður svokölluð Skerjaleið í norðvestur niður að bílum.

Ganga þarf frá greiðslu þremur vikum fyrir ferð.

Í þessari ferð verður gengið á einn af hundrað hæstu tindum landsins. Sjá nánar.

Fararstjórn

Tómas GuðbjartssonHelgi Jóhannesson og Jón Gauti Jónsson.
Innifalið
Fararstjórn.

Pakkað fyrir dagsferð á jökli

Ísland liggur við heimskautsbaug og alltaf má búast við vondum veðrum, sér í lagi þegar ferðast er á há fjöll eða jökla. Jafnframt krefjast jöklaferðir margvíslegs öryggisbúnaðar og því er dagpoki jöklaferðalangs töluvert þyngri en þegar gengið er á lægri fjöll utan jökla.

Athugið að enginn skyldi ferðast einn á jökli. Á sprungusvæðum jökla þarf að ganga í línu og lágmarkið er þrír í línu. Aðeins þeir sem hafa góða þekkingu á sprungubjörgun ættu að ferðast fararstjóralausir á jökli.

Listinn hér að neðan er ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar, veðri og árstíma.

Göngufatnaður

  • Góðir uppháir gönguskór úr leðri eða stífir jöklaskór
  • Mjúkir göngusokkar
  • Nærföt, ull eða flís
  • Peysa úr ull, flís eða mjúkskel
  • Göngubuxur

Í dagpokanum

  • Bakpokahlíf / plastpoki inni í bakpokanum
  • Áttaviti, landakort og GPS tæki
  • Smurt nesti fyrir daginn
  • Göngunasl svo sem þurrkaðir ávextir, súkkulaði og hnetur
  • Vatnsbrúsi. Nauðsynlegt er að taka nóg af vatni þegar ferðast er lengi á jökli
  • Hitabrúsi með kakói, tei eða kaffi
  • Göngustafir
  • Myndavél og kíkir
  • Sólgleraugu / skíðagleraugu
  • Sólarvörn og varasalvi
  • Hælsærisplástur, plástur, teygjubindi og verkjalyf
  • Salernispappír, blautþurrkur og litlir plastpokar fyrir notaðan pappír
  • Húfa, vettlingar og buff um hálsinn
  • Vind- og vatnsþéttur hlífðarfatnaður
  • Legghlífar

Öryggisbúnaður

  • Belti með karabínu
  • Jöklabroddar sem búið er að stilla á gönguskóna
  • Ísöxi
  • Jöklalína (hjá fararstjóra)
  • Sprungubjörgunarbúnaður (hjá fararstjóra)
  • Snjóflóðaýlir, snjóflóðastöng og skófla ef ferðast er um möguleg snjóflóðasvæði

Ef fjallaskíðaferð

  • Fjallaskíði og stafir
  • Skíðahjálmur
  • Skinn undir skíðin
  • Broddar undir skíðin