FÍ Landvættir

Verkefnislýsing 2018

Búið er að loka fyrir skráningar í æfingaverkefnið FÍ Landvætti 2018.

FÍ Landvættir er æfingaverkefni sem stendur í 10 mánuði, frá nóvember og fram í ágúst og hefur það takmark að ljúka öllum fjórum þrautum Landvættanna innan ársins. Landvættaþrautirnar fjórar eru eftirfarandi:

  • Fossavatnsgangan: 50 km skíðaganga. 28. apríl, 2018
  • Bláalónsþrautin: 60 km fjallahjól. 9. júní, 2018
  • Urriðavatnssundið: 2,5 km útisund. 28. júlí, 2018
  • Jökulsárhlaupið: 33 km fjallahlaup. 11. ágúst, 2018

Hópurinn er lokaður og æfir saman úti í náttúrunni á einni stórri æfingu í hverri viku, oftast annað hvort á laugardegi eða fimmtudegi. Þess á milli æfir hópurinn eftir fyrirfram ákveðinni æfingaáætlun. 

Fjórar æfingahelgar og tækninámskeið

Þátttakendur í FÍ Landvættum fá mikið persónulegt aðhald, eru tímamældir og þurfa að sýna fram á að þeir séu að æfa og undirbúa sig. Boðið er upp á súpufundi með fremstu sérfræðingum landsins í hverri þraut fyrir sig þar sem kjörin tækifæri gefast til að fara nánar í tæknileg atriði, líkamsbeitingu og útbúnað. Þá verður boðið upp á sérstakan fyrirlestur um næringu í kringum æfingar og þrautir sem þessar.

Að auki fer hópurinn fjórum sinnum í nokkurs konar æfingabúðir, þar sem sjónum verður beint að einni eða tveimur þrautum á tveimur dögum. Í þessum æfingabúðum verður meðal annars gengið á skíðum inn í Landmannalaugar, hlaupið yfir Fimmvörðuhálsinn og synt í vatni á Snæfellsnesi.

Þátttakendum bjóðast einnig afsláttarkjör á lengri aukanámskeið ef þeir þurfa á því að halda, t.d. skriðsundsnámskeið og gönguskíðanámskeið og þá verður boðið upp á kynningar- og afsláttarkjör á útbúnaði.

Fyrir hverja?

FÍ Landvættir er fyrir fólk sem vill stunda líkamsrækt úti í náttúru Íslands, setja sér ögrandi markmið og komast í frábært líkamlegt form í þéttum, skemmtilegum og styðjandi félagsskap.

Verkefnið er hugsað fyrir venjulegt fólk sem nú þegar er í sæmilegu formi og hreyfir sig meira eða minna reglulega. Verkefnið er ekki afreksverkefni á par við járnkarlaþrautirnar en hentar illa fyrir þá sem eru að taka sín fyrstu skref upp úr sófanum.

Til að fólk átti sig á tímamörkum hverrar þrautar fyrir sig þá er lágmarkið nokkurn veginn að fólk geti að minnsta kosti skíðað og hlaupið 10 km á undir 1 1/2 klst, hjólað 10 km á undir 40 mínútum og synt 1 km á undir 50 mínútum.

Þátttaka í æfingahópnum FÍ Landvættir 2018 kostar kr. 92.300 án árgjalds. Skráningagjöld í allar fjórar þrautirnar er um 45.000. Hægt er að dreifa greiðslunni í allt að tólf mánuði.

Umsjónarmenn verkefnisins eru Brynhildur Ólafsdóttir og Róbert Marshall.