Ferð: Ferðast á gönguskíðum

Hálendið
Ferðast á gönguskíðum
Skíðanámskeið sem endar í Landmannalaugum
Ert þú félagsmaður í FÍ Nei
Lýsing

Námskeiðið skiptist annars vegar í fræðslukvöld og hins vegar æfingaferð inn í Landmannalaugar.

Á fræðslukvöldinu verður farið yfir hvaða útbúnað er best að nota í vetrarferðalögum á skíðum, hvernig hægt er að breyta venjulegri snjóþotu í skíðapúlku til að draga farangurinn á eftir sér, hvernig á að tjalda í snjó og hvernig tjöld, dýnur og svefnpoka best er að nota.

Á síðari hluta námskeiðsins er svo komið að því að nota þekkinguna í alvöru vetrarferðalagi. Gengið á skíðum á laugardagsmorgni frá Hrauneyjum með farangurinn í eftirdragi, alls 25 km leið inn í Laugar þar sem tjaldað er í snjó við hlið skálans.

Markmiðið er að reyna sig í krefjandi vetraraðstæðum í eins öruggu umhverfi og kostur er. Vélsleðar fylgja hópnum og hægt er að skríða inn í skála ef tjaldvistin reynist óbærileg! Sama leið er gengin til baka daginn eftir.

Bóklegi hlutinn er 26. feb. kl. 19-22 í risi FÍ, Mörkinni 6, og verklega æfingin er helgina 10.-11. mars í Landmannalaugum. 

Fararstjóri/ar

Brynhildur Ólafsdóttir og Róbert Marshall.

Innifalið
Kennsla, verklegar æfingar, gisting og fararstjórn

Pakkað fyrir bakpokaferð

Þegar gengið er með allt á bakinu er nauðsynlegt að skera útbúnað niður eins og hægt er, án þess að sleppa nauðsynjum. Hafið bakpokann ekki þyngri en þið treystið ykkur til að bera. Hæfileg þyngd fer eftir líkamsástandi hvers og eins en oft er miðað við að bakpoki skuli ekki vera þyngri en 15-20% af líkamsþynd þess sem ber hann.

Athugið að listinn hér að neðan er ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar og hvort sofið er í skála eða tjaldi. Ef gengið er á milli skála, þá má í flestum skálum Ferðafélags Íslands finna eldunaraðstöðu og matarílát auk salernis/kamars með klósettpappír.

Ýmislegt

  • Bakpoki, ekki of stór
  • Svefnpoki, léttur og hlýr
  • Bakpokahlíf / plastpokar inn í bakpokann
  • Tjald og tjalddýna
  • Göngustafir
  • Áttaviti, landakort og GPS tæki
  • Höfuðljós
  • Viðgerðasett, nál og tvinni, snæri og klemmur
  • Myndavél og kíkir
  • Sólgleraugu / skíðagleraugu
  • Broddar, ef þurfa þykir
  • Peningar

Snyrtivörur / sjúkravörur

  • Hælsærisplástur, plástur og teygjubindi
  • Verkjalyf
  • Salernispappír, blautþurrkur og litlir plastpokar fyrir notaðan pappír
  • Tannbursti og tannkrem
  • Sápa / sjampó
  • Lítið handklæði / þvottapoki
  • Sólvarnarkrem og varasalvi
  • Eyrnatappar

Mataráhöld / eldunartæki

  • Prímus, eldsneyti og pottur
  • Eldspýtur
  • Diskur og drykkjarmál
  • Hnífapör
  • Hitabrúsi og drykkjarbrúsi
  • Vasahnífur / skæri

Fatnaður

  • Góðir gönguskór
  • Vaðskór / skálaskór
  • Tvö pör mjúkir göngusokkar
  • Húfa, vettlingar og buff um hálsinn
  • Nærbuxur til skiptana
  • Nærföt, ull eða flís
  • Flís- eða ullarpeysa
  • Millilag úr ull eða flís
  • Göngubuxur
  • Stuttbuxur
  • Vind- og vatnsþéttur hlífðarfatnaður
  • Legghlífar

Matur

  • Frostþurrkaður matur
  • Núðlur eða pasta í pokum
  • Haframjöl
  • Smurt brauð og flatkökur
  • Hrökkbrauð og kex
  • Þurrkaðir ávextir, súkkulaði og hnetur
  • Kakó, te og/eða kaffi
  • Súpur
  • Krydd, t.d. salt og pipar