Ferð: Helgafell með John Snorra

Suðvesturland
Helgafell með John Snorra
Fjallagarpaverkefni fjölskyldunnar 2 af 6
Ert þú félagsmaður í FÍ Nei
Lýsing

Önnur fjallgangan af sex í Fjallagarpaverkefni fjölskyldunnar. Þeir garpar sem ganga á öll fjöllin fá viðurkenningarskjal og titilinn Fjallagarpur Ferðafélags barnanna. Það má líka ganga bara á eitt fjall!

Gengið er á Helgafell í Hafnarfirði með John Snorra Sigurjónssyni, einum mesta fjallgöngumanni Íslands. Lagt af stað frá bílastæði ofan við Kaldársel.

Helgafell er ekki mjög hátt fjall en skemmtilegt og fjölbreytt fyrir unga fætur. John Snorri gefur ýmis gagnleg ráð fyrir fjallgöngur og segir okkur frá ævintýrum sínum á hæstu fjöllum heims. Vonandi verður gestabók á toppnum til að skrásetja afrekið.

Gengið er á alls konar undirlagi svo að gott er að vera í góðum skóm og að sjálfsögðu með nesti og vatn til að svala gönguþorstanum.

Fyrir félagsmenn FÍ og fjölskyldur þeirra. Ekkert að panta, bara mæta!

Pakkað fyrir dagsferð

Dagsferðir eru mismunandi og geta tekið frá örfáum klukkustundum upp í hálfan sólarhring.  Listinn hér að neðan er því ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar, veðri og árstíma.

Göngufatnaður

  • Góðir gönguskór og mjúkir göngusokkar
  • Nærföt, ull eða flís, eftir veðri
  • Peysa úr ull eða flís
  • Göngubuxur / stuttbuxur

Í dagpokanum

  • Bakpokahlíf / plastpoki inni í bakpokanum
  • Áttaviti, landakort og GPS tæki
  • Smurt nesti fyrir daginn
  • Göngunasl svo sem þurrkaðir ávextir, súkkulaði og hnetur
  • Vatnsbrúsi
  • Hitabrúsi með kakói, tei eða kaffi
  • Göngustafir
  • Myndavél og kíkir
  • Sólgleraugu / skíðagleraugu
  • Sólarvörn og varasalvi
  • Hælsærisplástur, plástur, teygjubindi og verkjalyf
  • Salernispappír, blautþurrkur og litlir plastpokar fyrir notaðan pappír
  • Húfa, vettlingar og buff um hálsinn
  • Vind- og vatnsþéttur hlífðarfatnaður
  • Legghlífar, vaðskór og broddar, ef þurfa þykir