Ferð: Hlöðuvík: Bækistöðvarferð

Hornstrandir
Hlöðuvík: Bækistöðvarferð
Náttúrufegurð og andrúmsloft liðinna tíma
Ert þú félagsmaður í FÍ Nei
Lýsing

Gengið um harðbýlar slóðir við nyrstu víkur Sléttuhrepps þar sem fólk tókst á við harðneskjuleg náttúruöfl fyrr á tímum.

Í Hælavík fæddist skáldkonan Jakobína Sigurðardóttir sem skrifað hefur endurminningar frá bernskuárum sínum þar og lýst lífsbaráttu fólksins á þessum slóðum.

Dvalið er í Búðum í Hlöðuvík og þaðan gengnar leiðirnar yfir skörðin sem fólk fór milli víka og fjarða fyrr á tíð. Um leið drögum við að okkur andrúmsloft liðinna tíma og njótum einstæðrar náttúrufegurðar.

Fólk gistir á eigin vegum nóttina fyrir brottför.

Fararstjórn

Ólína Kjerúlf Þorvarðardóttir og Sigurður Pétursson.

Innifalið
Sigling, gisting í þrjár nætur og fararstjórn

Leiðarlýsing

1.d., föstud. Siglt í Hlöðuvík þar sem hópurinn kemur sér fyrir í Búðum. Síðdegis er gengið yfir í Kjaransvík og vaðið yfir Hlöðuvíkurós á leiðinni. 7 km. 3-4 klst.

2.d. Gengið upp á bæjarfjallið í Hlöðuvík um Skálarkamb og brúnum fylgt inn með Hælavíkinni í Atlaskarð þaðan sem sést niður í Rekavík. 14-16 km. 7-8 klst.

3.d. Aftur gengið um Skálarkamb en nú er haldið niður í Hælavík, út með víkinni og upp á Hælavíkurbjarg þar sem má finna eina mestu fuglabyggð í heimi. Gengið með bjargbrúnum inn undir Sigmundarfell og Hvanndalsskarð. Rekavíkurfjalli fylgt til baka. 19 km. 8-10 klst.

4.d. Rólegur dagur. Frágangur og sigling til baka.

Pakkað fyrir trússferð eða bækistöðvarferð

Í trússaðri ferð er farangur fluttur á milli náttstaða svo aðeins þarf að bera nauðsynlegan búnað fyrir einn dag í einu í léttum dagpoka. Mat, svefnpoka og tilheyrandi er pakkað ofan í trússtösku og flutt í náttstað, sem getur ýmist verið tjaldstæði eða skáli.

Þó að ekki þurfi í trússferðum að skera allan útbúnað niður eins og þegar gengið er með allt á bakinu þá er nauðsynlegt að pakka naumt. Oftast er takmarkað pláss í trússbílum og bátum og pökkun þarf að taka mið af því.

Bækistöðvaferð er svipuð trússferðum en þá er gengið með dagpoka út frá sama náttstað allan tímann, tjaldi eða skála. Í bækistöðvaferðum er farangur ekki trússaður á milli náttstaða og hægt að vera enn frjálslegri í pökkun en í trússferðunum.

Athugið að listinn hér að neðan er ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar og hvort sofið er í skála eða tjaldi. Ef gengið er á milli skála eða dvalið í skála, þá má þar oftast finna eldunaraðstöðu og matarílát auk salernis eða kamars með klósettpappír.

Göngufatnaður

  • Góðir gönguskór og mjúkir göngusokkar
  • Nærföt, ull eða flís, eftir veðri
  • Peysa úr ull eða flís
  • Göngubuxur / stuttbuxur

Í dagpokanum

  • Bakpokahlíf / plastpoki inni í bakpokanum
  • Áttaviti, landakort og GPS tæki
  • Smurt nesti fyrir daginn
  • Göngunasl svo sem þurrkaðir ávextir, súkkulaði og hnetur
  • Vatnsbrúsi
  • Hitabrúsi með kakói, tei eða kaffi
  • Göngustafir
  • Myndavél og kíkir
  • Sólgleraugu
  • Sólarvörn og varasalvi
  • Hælsærisplástur, plástur, teygjubindi og verkjalyf
  • Salernispappír, blautþurrkur og litlir plastpokar fyrir notaðan pappír
  • Húfa, vettlingar og buff um hálsinn
  • Vind- og vatnsþéttur hlífðarfatnaður
  • Legghlífar, vaðskór og broddar, ef þurfa þykir

Í trússtöskunni

  • Svefnpoki og lítill koddi
  • Bolur til skiptana og til að sofa í
  • Auka nærbuxur og sokkar
  • Höfuðljós
  • Tannbursti og tannkrem
  • Sápa / sjampó
  • Lítið handklæði
  • Eyrnatappar
  • Skálaskór
  • Peningar
  • Núðlur eða pasta í pokum
  • Pulsur eða foreldaðar kjúklingabringur
  • Eitthvað gott á grillið
  • Kol og uppkveikilögur
  • Haframjöl
  • Brauð og flatkökur
  • Smjör og álegg, svo sem ostur, kæfa, hangikjöt
  • Hrökkbrauð og kex
  • Þurrkaðir ávextir, súkkulaði og hnetur
  • Kakó, te og/eða kaffi
  • Súpur
  • Krydd, t.d. salt og pipar

Ef sofið er í tjaldi þarf að auki í trússtöskuna

  • Tjald og tjalddýna
  • Prímus og eldsneyti
  • Eldspýtur
  • Pottur
  • Hitabrúsi og drykkjarbrúsi
  • Diskur og drykkjarmál
  • Hnífapör
  • Vasahnífur / skæri
  • Viðgerðasett, nál og tvinni, snæri og klemmur