Ferð: Kerlingarfjöll

Hálendið
Kerlingarfjöll
„Einhvern tíma alla toppa klíf ég...“
Ert þú félagsmaður í FÍ Nei
Lýsing

Fjallgöngur um frábært svæði þar sem fjöll, jöklar og hverasvæði verða á vegi okkar. Stórkostlegt útsýni yfir miðhálendi Íslands og krefjandi verkefni fyrir vana göngumenn.

Fyrst er gengið um eystri hluta Kerlingarfjalla og síðan um vestari fjöllin.

Í þessari ferð verður gengið á fimm af hundrað hæstu tindum landsins. Sjá nánar.

Fararstjóri/ar

Ævar Aðalsteinsson og Örvar Aðalsteinsson

Innifalið
Gisting og fararstjórn

Leiðarlýsing

1.d., föstud. Ekið í Kerlingarfjöll. Gist í skála FÍ í Árskarði.

2.d. Ekið upp að neðri Hveradölum og gengið á Austurfjöllin: Fannborg, Hverahnúk, Snækoll, Snót og Loðmund. Gengið austur fyrir fjöllin um efri Hveradali og aftur niður í bíla í gegnum stórbrotin hverasvæði og gil. Ekið í skála. Kvöldvaka í anda Kerlingarfjalla. 16 km. Hækkun 900m.

3.d. Aftur ekið upp að neðri Heradölum en nú er gengið á Vesturfjöllin: Mæni, Ögmund, Hött og Röðul áður en haldið er til baka í bíla. 17 km. Hækkun 1400m.

Í fótspor skíðakennara

Kerlingafjöllin hafa yfir sér goðsagnakenndan blæ. Þar var skíðaskóli um áratugaskeið þar sem Valdimar Örnólfsson skíðakennari og fleiri héldu uppi öflugri kennslu. Örvar og Ævar Aðalsteinsson stefna á helstu tinda Kerlingafjalla með sitt fólk, í þriggja daga ferð, seinnipartinn í ágúst. Gist verður í skála Ferðafélags Íslands í Árskarði, Göngufólk mun í ferðinni toppa fimm af hundrað hæstu tindum Íslands.

Á kvöldin munu bræðurnir vera með kvöldvöku í anda þess sem var þegar skíðaskólinn var í fullum gangi. Fararstjórarnir spila á hljóðfæri og skipa hljómsveitina Bræðrabandið. Þeir kunna aragrúa af söngkvæðum. Gleðin mun því verða við völd og söngurinn óma í óbyggðum.

Þetta er krefjandi ferð og aðeins á færi þeirra sem eru vanir göngum.

Pakkað fyrir trússferð eða bækistöðvarferð

Í trússaðri ferð er farangur fluttur á milli náttstaða svo aðeins þarf að bera nauðsynlegan búnað fyrir einn dag í einu í léttum dagpoka. Mat, svefnpoka og tilheyrandi er pakkað ofan í trússtösku og flutt í náttstað, sem getur ýmist verið tjaldstæði eða skáli.

Þó að ekki þurfi í trússferðum að skera allan útbúnað niður eins og þegar gengið er með allt á bakinu þá er nauðsynlegt að pakka naumt. Oftast er takmarkað pláss í trússbílum og bátum og pökkun þarf að taka mið af því.

Bækistöðvaferð er svipuð trússferðum en þá er gengið með dagpoka út frá sama náttstað allan tímann, tjaldi eða skála. Í bækistöðvaferðum er farangur ekki trússaður á milli náttstaða og hægt að vera enn frjálslegri í pökkun en í trússferðunum.

Athugið að listinn hér að neðan er ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar og hvort sofið er í skála eða tjaldi. Ef gengið er á milli skála eða dvalið í skála, þá má þar oftast finna eldunaraðstöðu og matarílát auk salernis eða kamars með klósettpappír.

Göngufatnaður

  • Góðir gönguskór og mjúkir göngusokkar
  • Nærföt, ull eða flís, eftir veðri
  • Peysa úr ull eða flís
  • Göngubuxur / stuttbuxur

Í dagpokanum

  • Bakpokahlíf / plastpoki inni í bakpokanum
  • Áttaviti, landakort og GPS tæki
  • Smurt nesti fyrir daginn
  • Göngunasl svo sem þurrkaðir ávextir, súkkulaði og hnetur
  • Vatnsbrúsi
  • Hitabrúsi með kakói, tei eða kaffi
  • Göngustafir
  • Myndavél og kíkir
  • Sólgleraugu
  • Sólarvörn og varasalvi
  • Hælsærisplástur, plástur, teygjubindi og verkjalyf
  • Salernispappír, blautþurrkur og litlir plastpokar fyrir notaðan pappír
  • Húfa, vettlingar og buff um hálsinn
  • Vind- og vatnsþéttur hlífðarfatnaður
  • Legghlífar, vaðskór og broddar, ef þurfa þykir

Í trússtöskunni

  • Svefnpoki og lítill koddi
  • Bolur til skiptana og til að sofa í
  • Auka nærbuxur og sokkar
  • Höfuðljós
  • Tannbursti og tannkrem
  • Sápa / sjampó
  • Lítið handklæði
  • Eyrnatappar
  • Skálaskór
  • Peningar
  • Núðlur eða pasta í pokum
  • Pulsur eða foreldaðar kjúklingabringur
  • Eitthvað gott á grillið
  • Kol og uppkveikilögur
  • Haframjöl
  • Brauð og flatkökur
  • Smjör og álegg, svo sem ostur, kæfa, hangikjöt
  • Hrökkbrauð og kex
  • Þurrkaðir ávextir, súkkulaði og hnetur
  • Kakó, te og/eða kaffi
  • Súpur
  • Krydd, t.d. salt og pipar

Ef sofið er í tjaldi þarf að auki í trússtöskuna

  • Tjald og tjalddýna
  • Prímus og eldsneyti
  • Eldspýtur
  • Pottur
  • Hitabrúsi og drykkjarbrúsi
  • Diskur og drykkjarmál
  • Hnífapör
  • Vasahnífur / skæri
  • Viðgerðasett, nál og tvinni, snæri og klemmur