Ferð: Lómagnúpur

Suðurland
Lómagnúpur
Gengið á sjálfan landvætt Suðurlands
Ert þú félagsmaður í FÍ Nei
Lýsing

Lómagnúpur, 764 m, er eitt hæsta standberg á Íslandi og gnæfir yfir vestanverðum Skeiðarársandi eins og mikill vindbrjótur.

Gengið er á fjallið vestan megin, um Aurá og Skorur, upp bratta hjalla og brekkur og upp klett með keðju, meðfram Fjaðrárdalshnúki og fram á hamarinn sem gnæfir yfir sandinum. 22 km. 10-12 klst.

Lómagnúpur er mikið útsýnisfjall sem býður göngumönnum upp á afar sérstakt útsýni. Toppur fjallsins er ekki við hamarinn sjálfan heldur upp á fjallinu miðju.

Útsýni er yfir Skeiðarársandinn og hafið. Þjóðvegur 1 liggur beint fyrir neðan og gaman er að sjá hann frá þessu sjónarhorni. Við blasa líka Öræfajökull, Hrútsfjallstindar, Þumall, Miðfellstindur ásamt Skaftafellsfjöllum, Færineseggjum og Skeiðarárjökuli. Einnig sést Hjörleifshöfði, Hafursey og Mýrdalsjökull og inn á Vatnajökul allt til Grímsvatna.

Þátttakendur aka á einkabílum að Lómagnúpi á göngudagsmorgun. Athugið að frá Reykjavík að Lómagnúpi eru um 287 km og tekur allt að 4 klst. að aka þá vegalengd. Þeir sem kjósa að gista við eða nálægt uppgöngustað gera það á eigin vegum. Gistingu er að finna víða á svæðinu.

Fararstjórn

Ragnar Antoniussen.

Innifalið
Fararstjórn

Pakkað fyrir dagsferð

Dagsferðir eru mismunandi og geta tekið frá örfáum klukkustundum upp í hálfan sólarhring.  Listinn hér að neðan er því ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar, veðri og árstíma.

Göngufatnaður

  • Góðir gönguskór og mjúkir göngusokkar
  • Nærföt, ull eða flís, eftir veðri
  • Peysa úr ull eða flís
  • Göngubuxur / stuttbuxur

Í dagpokanum

  • Bakpokahlíf / plastpoki inni í bakpokanum
  • Áttaviti, landakort og GPS tæki
  • Smurt nesti fyrir daginn
  • Göngunasl svo sem þurrkaðir ávextir, súkkulaði og hnetur
  • Vatnsbrúsi
  • Hitabrúsi með kakói, tei eða kaffi
  • Göngustafir
  • Myndavél og kíkir
  • Sólgleraugu / skíðagleraugu
  • Sólarvörn og varasalvi
  • Hælsærisplástur, plástur, teygjubindi og verkjalyf
  • Salernispappír, blautþurrkur og litlir plastpokar fyrir notaðan pappír
  • Húfa, vettlingar og buff um hálsinn
  • Vind- og vatnsþéttur hlífðarfatnaður
  • Legghlífar, vaðskór og broddar, ef þurfa þykir