Ferð: Móskarðshnúkar með Vilborgu Örnu

Suðvesturland
Móskarðshnúkar með Vilborgu Örnu
Fjallagarpaverkefni fjölskyldunnar 3 af 6
Ert þú félagsmaður í FÍ Nei
Lýsing

Þriðja fjallgangan af sex í Fjallagarpaverkefni fjölskyldunnar. Þeir garpar sem ganga á öll fjöllin fá viðurkenningarskjal og titilinn Fjallagarpur Ferðafélags barnanna. Það má líka ganga bara á eitt fjall!

Ekið á einkabílum upp í Mosfellsdal og gengið á Móskarðshnúka, fjallstindana þar sem sólin skín alla daga, með Vilborgu Örnu Gissurardóttur, einum fremsta fjallagarpi Íslands, sem gengið hefur á hæstu fjöll heimsins. Vilborg Arna kennir okkur ýmislegt sem nauðsynlegt er að vita til að verða alvöru fjallagarpur og segir okkur jafnframt frá háfjallaævintýrum sínum.

Móskarðshnúkar eru undurfagrir og skarta ævintýralegum litum. Spennandi en nokkuð bratt göngulandslag sem er skemmtilegt viðfangsefni fyrir duglega fjallagarpa. Gott er að vera í góðum skóm og að sjálfsögðu með nesti.

Fyrir félagsmenn FÍ og fjölskyldur þeirra. Ekkert að panta, bara mæta!

Pakkað fyrir dagsferð

Dagsferðir eru mismunandi og geta tekið frá örfáum klukkustundum upp í hálfan sólarhring.  Listinn hér að neðan er því ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar, veðri og árstíma.

Göngufatnaður

  • Góðir gönguskór og mjúkir göngusokkar
  • Nærföt, ull eða flís, eftir veðri
  • Peysa úr ull eða flís
  • Göngubuxur / stuttbuxur

Í dagpokanum

  • Bakpokahlíf / plastpoki inni í bakpokanum
  • Áttaviti, landakort og GPS tæki
  • Smurt nesti fyrir daginn
  • Göngunasl svo sem þurrkaðir ávextir, súkkulaði og hnetur
  • Vatnsbrúsi
  • Hitabrúsi með kakói, tei eða kaffi
  • Göngustafir
  • Myndavél og kíkir
  • Sólgleraugu / skíðagleraugu
  • Sólarvörn og varasalvi
  • Hælsærisplástur, plástur, teygjubindi og verkjalyf
  • Salernispappír, blautþurrkur og litlir plastpokar fyrir notaðan pappír
  • Húfa, vettlingar og buff um hálsinn
  • Vind- og vatnsþéttur hlífðarfatnaður
  • Legghlífar, vaðskór og broddar, ef þurfa þykir