Ferð: Rökkurferð í Hvítárnesskála

Hálendið
Rökkurferð í Hvítárnesskála
Sigling og léttar göngur í dulmögnuðu umhverfi
Ert þú félagsmaður í FÍ Nei
Lýsing

Skálarnir við Kjalveg voru reistir á fystu árum Ferðafélagsins og mikið notaðir sem bækistöðvar til náttúruskoðunar og gönguferða um nágrennið.

Nú, á 90 ára afmælisári FÍ, endurtökum við leikinn og heimsækjum elsta sæluhús félagsins. Það var reist árið 1930 og stendur í Hvítárnesi við Hvítárvatn.

Fararstjóri/ar
Ævar Aðalsteinsson og Örvar Aðalsteinsson
Innifalið
Skálagisting, bátsferð og fararstjórn

Leiðarlýsing

1.d., föstud. Ekið í Hvítárnesskála þar sem hópurinn kemur sér fyrir.

2.d. Sigling á Hvítárvatni yfir í Karlsdrátt. Norðurjökull skoðaður og gróður í haustlitum. Val um bátsferð til baka eða göngu upp á Leggjarbrjót og til baka yfir vötn í Hvítárnes. 15 km.

3.d. Eftir rólega morgunstund í skálanum  og nágrenni hans er haldið áleiðis til byggða með viðkomu á Bláfellshálsi þaðan sem gengið er á Bláfell. 7 km.

Kvendraugur í Hvítárnesi

Undir lok september þegar húmar að hausti fara bræðurnir Ævar og örvar Aðalsteinssynir með hóp að Hvítárvatni. Gist verður í elsta sæluhúsi landsins, skála Ferðafélags Íslands í Hvítárnesi. Ferðin er farin í tilefni af 90 ára afmæli félagsins.

Skálinn hefur komist í marga annála vegna meints draugagangs. Fjölmargar sögur eru til á prenti og meira að segja var skrifuð ritgerð um draugaganginn. Fullyrt er að það séu helst karlmenn sem verða varir við reimleika í skálanum. Sömu heimildir telja að um sé að ræða kvendraug sem standi vörð um ákveðna koju í skálanum, „Draugakojuna“. Hún er við útidyrnar og snýr þvert á aðrar kojur í skálanum. Margir hafa vitnað til þess að þeim hafi hreinlega verið sparkað úr kojunni.

Víst er að bræðurnir munu rifja upp sögur af atganginum í skálanum. Það kemur svo í ljós hvort einhver þorir að sofa í þverkojunni. Eftir nætursvefn verður haldið með báti yfir Hvítárvatn og Karlskriki skoðaður. Lagt er upp með að ferðin sé ekki erfið og fólki gefinn kostur á því að sigla til baka. Þeir sem það kjósa geta þó gengið fyrir vatnið og í skálann.

Sögustund verður að kveldi áður en nóttin gengur í garð. Daginn eftir verður síðan haldið áleiðis heim með viðkomu á Bláfellshálsi þaðan sem gengið verður á Bláfell.

Pakkað fyrir trússferð eða bækistöðvarferð

Í trússaðri ferð er farangur fluttur á milli náttstaða svo aðeins þarf að bera nauðsynlegan búnað fyrir einn dag í einu í léttum dagpoka. Mat, svefnpoka og tilheyrandi er pakkað ofan í trússtösku og flutt í náttstað, sem getur ýmist verið tjaldstæði eða skáli.

Þó að ekki þurfi í trússferðum að skera allan útbúnað niður eins og þegar gengið er með allt á bakinu þá er nauðsynlegt að pakka naumt. Oftast er takmarkað pláss í trússbílum og bátum og pökkun þarf að taka mið af því.

Bækistöðvaferð er svipuð trússferðum en þá er gengið með dagpoka út frá sama náttstað allan tímann, tjaldi eða skála. Í bækistöðvaferðum er farangur ekki trússaður á milli náttstaða og hægt að vera enn frjálslegri í pökkun en í trússferðunum.

Athugið að listinn hér að neðan er ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar og hvort sofið er í skála eða tjaldi. Ef gengið er á milli skála eða dvalið í skála, þá má þar oftast finna eldunaraðstöðu og matarílát auk salernis eða kamars með klósettpappír.

Göngufatnaður

  • Góðir gönguskór og mjúkir göngusokkar
  • Nærföt, ull eða flís, eftir veðri
  • Peysa úr ull eða flís
  • Göngubuxur / stuttbuxur

Í dagpokanum

  • Bakpokahlíf / plastpoki inni í bakpokanum
  • Áttaviti, landakort og GPS tæki
  • Smurt nesti fyrir daginn
  • Göngunasl svo sem þurrkaðir ávextir, súkkulaði og hnetur
  • Vatnsbrúsi
  • Hitabrúsi með kakói, tei eða kaffi
  • Göngustafir
  • Myndavél og kíkir
  • Sólgleraugu
  • Sólarvörn og varasalvi
  • Hælsærisplástur, plástur, teygjubindi og verkjalyf
  • Salernispappír, blautþurrkur og litlir plastpokar fyrir notaðan pappír
  • Húfa, vettlingar og buff um hálsinn
  • Vind- og vatnsþéttur hlífðarfatnaður
  • Legghlífar, vaðskór og broddar, ef þurfa þykir

Í trússtöskunni

  • Svefnpoki og lítill koddi
  • Bolur til skiptana og til að sofa í
  • Auka nærbuxur og sokkar
  • Höfuðljós
  • Tannbursti og tannkrem
  • Sápa / sjampó
  • Lítið handklæði
  • Eyrnatappar
  • Skálaskór
  • Peningar
  • Núðlur eða pasta í pokum
  • Pulsur eða foreldaðar kjúklingabringur
  • Eitthvað gott á grillið
  • Kol og uppkveikilögur
  • Haframjöl
  • Brauð og flatkökur
  • Smjör og álegg, svo sem ostur, kæfa, hangikjöt
  • Hrökkbrauð og kex
  • Þurrkaðir ávextir, súkkulaði og hnetur
  • Kakó, te og/eða kaffi
  • Súpur
  • Krydd, t.d. salt og pipar

Ef sofið er í tjaldi þarf að auki í trússtöskuna

  • Tjald og tjalddýna
  • Prímus og eldsneyti
  • Eldspýtur
  • Pottur
  • Hitabrúsi og drykkjarbrúsi
  • Diskur og drykkjarmál
  • Hnífapör
  • Vasahnífur / skæri
  • Viðgerðasett, nál og tvinni, snæri og klemmur