Ferð: Stórbrotnir töfrar Hornstranda

Hornstrandir
Stórbrotnir töfrar Hornstranda
Gengið út frá Hornbjargsvita, um Hornbjarg og Hornvík
Ert þú félagsmaður í FÍ Nei
Lýsing

Á Hornströndum renna haf og himinn saman í hrikalegri fegurð og dulúð. Það er mikil upplifun að sigla inn í Jökulfirði, ganga yfir í Hornbjargsvita, njóta mikilfengleika Hornbjargs og blómskrúðsins í Hornvík. Ekki spillir hin mikla og óvenjulega mannlífssaga sem gefur gönguferðum um friðlandið enn meira gildi.

Gist er í þrjár nætur í Hornbjargsvita og dvalið við náttúruskoðun og gönguferðir. Sameiginlegur matur.

Þátttakendur hafa með sér svefnpoka og fatnað til ferðarinnar sem þeir bera frá Lónafirði yfir í Hornbjargsvita í upphafi ferðar og frá Hornbjargsvita yfir í Veiðileysufjörð í lok ferðar.

Fararstjóri/ar

Lilja Steingrímsdóttir

Innifalið
Gisting, sigling, fullt fæði og fararstjórn

Leiðarlýsing

1.d., fimmtud. Siglt í Lónafjörð í Jökulfjörðum þaðan sem þátttakendur ganga með allan farangur, fyrir utan mat, yfir Snókaheiði og í Hornbjargsvita. 14 km. Hækkun 500 m.

2.d. Gengið á Hornbjarg og mögulega Kálfatinda. Til baka um Almenningaskarð eða Kýrskarð. 14 km.

3.d. Létt ganga um nágrennið, Hrolllaugsvík og Bjarnarnes og mögulega að fossinum Drífanda.

4.d. Gengið um Kýrskarð yfir í Hornvík þar sem vaða þarf Hafnarósinn. Síðan um Hafnarskarð yfir í Veiðileysufjörð þar sem bátur sækir hópinn kl. 17:30. 16 km. Hækkun 800 m.

Heimur Hornstranda

Hornstrandir hafa í gegnum tíðina heillað marga. Dæmi eru um að fólk fari áratugum saman á þessar harðbýlu slóðir og uppgötvi stöðugt eitthvað nýtt. Sú var tíð að þéttbýlt var á Hornströndum. Nú er staðan sú að enginn er þar yfir harðasta veturinn en þegar vorar birtist sumarfólkið.

Lilja Steingrímsdóttir fararstjóri opnar fólki þennan heim í sumar þegar siglt verður með hópinn frá Bolungarvík í Lónafjörð þar sem gangan áleiðis á Hornbjargsvita hefst. Farið er yfir Snókaheiði, 14 kílómetra leið, í vitann þar sem Halldór Hafdal Halldórsson staðarhaldari tekur á móti fólki. Rómaðar fiskibollur hans eru væntanlega á matseðlinum. Þá þykju vöfflurnar í Hornbjargsvita vera hnossgæti. Að morgni flaggar Halldór að vanda að viðstöddum gestum. Við það tækifæri er þjóðsöngurinn sunginn af krafti og virðingu.

Daginn eftir verður haldið á Hornbjarg og hugsanlega gengið á Kálfatinda. Á þriðja degi verður haldið um Kýrskarð í Hornvík þar sem Hafnarósinn verður vaðinn. Síðan er lagt á Hafnarskarð og yfir í Veiðileysufjörð þar sem báturinn bíður ferðalanganna. Siglt er sem leið liggur í Bolungarvík þangað sem þreyttir ferðalangar koma reynslunni ríkari,

Þetta er ferð sem hentar flestum og tilvalin fyrir þá sem vilja kynnast svæðinu í fyrsta sinn.

Pakkað fyrir bakpokaferð

Þegar gengið er með allt á bakinu er nauðsynlegt að skera útbúnað niður eins og hægt er, án þess að sleppa nauðsynjum. Hafið bakpokann ekki þyngri en þið treystið ykkur til að bera. Hæfileg þyngd fer eftir líkamsástandi hvers og eins en oft er miðað við að bakpoki skuli ekki vera þyngri en 15-20% af líkamsþynd þess sem ber hann.

Athugið að listinn hér að neðan er ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar og hvort sofið er í skála eða tjaldi. Ef gengið er á milli skála, þá má í flestum skálum Ferðafélags Íslands finna eldunaraðstöðu og matarílát auk salernis/kamars með klósettpappír.

Ýmislegt

  • Bakpoki, ekki of stór
  • Svefnpoki, léttur og hlýr
  • Bakpokahlíf / plastpokar inn í bakpokann
  • Tjald og tjalddýna
  • Göngustafir
  • Áttaviti, landakort og GPS tæki
  • Höfuðljós
  • Viðgerðasett, nál og tvinni, snæri og klemmur
  • Myndavél og kíkir
  • Sólgleraugu / skíðagleraugu
  • Broddar, ef þurfa þykir
  • Peningar

Snyrtivörur / sjúkravörur

  • Hælsærisplástur, plástur og teygjubindi
  • Verkjalyf
  • Salernispappír, blautþurrkur og litlir plastpokar fyrir notaðan pappír
  • Tannbursti og tannkrem
  • Sápa / sjampó
  • Lítið handklæði / þvottapoki
  • Sólvarnarkrem og varasalvi
  • Eyrnatappar

Mataráhöld / eldunartæki

  • Prímus, eldsneyti og pottur
  • Eldspýtur
  • Diskur og drykkjarmál
  • Hnífapör
  • Hitabrúsi og drykkjarbrúsi
  • Vasahnífur / skæri

Fatnaður

  • Góðir gönguskór
  • Vaðskór / skálaskór
  • Tvö pör mjúkir göngusokkar
  • Húfa, vettlingar og buff um hálsinn
  • Nærbuxur til skiptana
  • Nærföt, ull eða flís
  • Flís- eða ullarpeysa
  • Millilag úr ull eða flís
  • Göngubuxur
  • Stuttbuxur
  • Vind- og vatnsþéttur hlífðarfatnaður
  • Legghlífar

Matur

  • Frostþurrkaður matur
  • Núðlur eða pasta í pokum
  • Haframjöl
  • Smurt brauð og flatkökur
  • Hrökkbrauð og kex
  • Þurrkaðir ávextir, súkkulaði og hnetur
  • Kakó, te og/eða kaffi
  • Súpur
  • Krydd, t.d. salt og pipar