Gönguferð að gosstöðvum - mikilvæg atriði fyrir göngufólk
Ferðafélag Íslands hvetur öll sem hyggjast fara í skoðunarferð að gossvæðinu að fylgja leiðbeiningum almannavarna í hvívetna og huga vel að fatnaði, búnaði og nesti.
Ferðafélag Íslands hvetur fólk jafnframt til að skilja ekki eftir sig rusl á leiðinni, ganga vel um náttúruna og fara varlega.
,,Gönguferð að gossvæðinu og til baka er um 20 km löng leið. Gengið er um grýtt og gróft landslag sem er aðeins á fótinn. Öll sem leggja í slíka göngu þurfa að vera með réttan búnað og í ágætu líkamlegu formi, '' segir Ólöf Kristín Sívertsen forseti Ferðafélags Íslands.
Gott er að huga vel að eftirfarandi atriðum áður en lagt er af stað í gönguferð eftir leyfilegum leiðum i átt að gossvæðinu.:
Mælt er með því að taka með sér rykgrímu (N95, FFP2). Þar sem mikill reykur er frá gróðureldum. Töluvert svifryk hefur mælst á leiðinni skv. mælingum Veðurstofu.
Göngufatnaður
- Góðir gönguskór með góðum öklastuðningi og göngusokkar
- Nærföt, ull eða flís, eftir veðri
- Peysa úr ull eða flís
- Göngubuxur / hlífðarfatnaður
Bakpoki með öllu sem þarf fyrir svona langa göngu:
- Smurt nesti fyrir daginn
- Göngunasl svo sem þurrkaðir ávextir, súkkulaði og hnetur
- Vatn, 1 - 2 ltr.
- Hitabrúsi með kakói, tei eða kaffi
- Göngustafir
- Myndavél og kíkir
- Sólgleraugu
- Sólarvörn og varasalvi
- Hælsærisplástur, plástur, teygjubindi og verkjalyf
- Salernispappír, blautþurrkur og litlir plastpokar fyrir notaðan pappír
- Húfa, vettlingar og buff.
- Vind- og vatnsþéttur hlífðarfatnaður
Ferðafélag Íslands hvetur fólk eindregið til að fylgja leiðbeiningum almannavarna því við viljum öll komast heil heim.
https://www.fi.is/is/frodleikur/bunadarlistar/dagsferdir
