Hagavatn

Smellið á bláa hnappinn hér uppi til hægri til að bóka skálagistingu.

AÐSTAÐA

Gönguskálinn undir Einifelli við Hagavatn er lítill en huggulegur skáli.

Komið er inn í opið anddyri og stigið upp á pall með kojum til sitt hvorrar handar og borði á milli. Lítið opið svefnloft er yfir hálfum skálanum. 6-8 manns geta sofið í kojunum og 4 manns á svefnloftinu en þá er þröngt legið.

Ekki er eiginleg eldhúsaðstaða í skálanum en hann er hitaður upp með viðarkamínu. Ekkert rennandi vatn er á svæðinu en kamar stendur skammt frá skálanum. Gott tjaldstæði er bæði undir Einifellinu sem og við skálann.

Skálinn var reistur árið 1942.

OPNUN OG AÐGENGI

Að sumri til er hægt að aka á jeppum að skálunum, beygt er út af Kjalvegi við Sandá og fjallvegi fylgt þaðan. Vegurinn getur verið grýttur á köflum en einnig þarf að aka yfir óbrúaða læki.

Opnun skálans yfir sumartímann helst í hendur við snjóalög og ástand vegarins. 

Yfir vetrartímann en hægt er að leigja skálann með því að senda fyrirspurn á skrifstofu FÍ. Athugið að það er aðeins á færi reynslumikils ferðafólks að ferðast um þessar slóðir að vetri til og ef ætlunin er að ganga þá þarf til þess 5 árstíða útbúnað.

NÆSTA NÁGRENNI

Fallegir fossar eru í Farinu, skammt frá skálanum.