Hornbjargsviti

Smellið á bláa hnappinn hér uppi til hægri til að bóka skálagistingu.

AÐSTAÐA

Í Hornbjargsvita er gistiaðstaða fyrir allt að 40 manns.

Húsið er stórt og rúmgott. Sofið er í rúmum og kojum í sjö aðskildum herbergjum. Gott eldhús er á staðnum með öllum áhöldum og útbúnaði og bæði rafmagns- og gaseldavél. Að auki er gott kolagrill við húsið. Gestir koma sjálfir með kol og kveikivökva.

Vatnssalerni er inni í húsinu og sturta. Góð aðstaða er til að þurrka blaut föt og skó.

Við húsið er tjaldsvæði með aðgangi að vatnssalernum og aðstöðu til að elda og borða í gömlu útihúsi.

OPNUN OG AÐGENGI

Í meðalári má gera ráð fyrir að Hornbjargsviti sé opinn frá miðjum júní fram í byrjun ágúst.

Hægt er að sigla beint í Látravík frá Norðurfirði. Einnig er hægt að sigla frá Ísafirði í Hornvík og ganga þaðan.

Skálinn er lokaður og læstur yfir vetrartímann og að öllu jöfnu er ekki hægt að komast þar inn að vetrarlagi.  

Athugið að Hornbjargsviti er innan Friðlandsins á Hornströndum og hundar eru bannaðir á svæðinu.

Nánari upplýsingar um reglur sem gilda innan friðlandsins má nálgast á vef Náttúruverndarstofnunar: Hornstrandir

NÆSTA NÁGRENNI

Á Hornströndum eru ótal gönguleiðir. Af gönguleiðum nálægt Hornbjargsvita ber hæst að nefna gönguna á Hornbjarg.