Hvítárnes

Smellið á hnappinn hér uppi til hægri til að bóka skálagistingu.

Sæluhúsið í Hvítárnesi er elsti skáli Ferðafélags Íslands. Húsið er reist 1930 og er byggingin friðuð.

Skálinn er við gönguleiðina um Kjalveg hinn forna.

AÐSTAÐA

Skálinn er á tveimur hæðum og þar geta 30 manns sofið. Á neðri hæðinni er anddyri, lítið og þröngt eldhús og tvö herbergi með kojum. Á efri hæðinni er svefnloft með dýnum á gólfinu og lítið herbergi með dýnum. Viðarkamína til hitunar. 

Í eldhúsinu er rennandi vatn, gashellur og eldhúsáhöld. Salernishús er spölkorn frá skálanum en engar sturtur. Tjaldað er á grasbala við salernishúsið.

OPNUN OG AÐGENGI

Að sumri til er hægt að aka á jeppum að skálanum. Beygt er af Kjalvegi skammt frá Hvítárbrú og ekið yfir Svartá á brú.

Opnun skálanna yfir sumartímann helst í hendur við opnun Vegagerðarinnar á Kjalvegi og fer eftir snjóalögum og ástandi vegarins.

Hægt er að leigja skálann yfir vetrartímann með því að senda fyrirspurn á skrifstofu FÍ. Athugið að það er aðeins á færi reynslumikils ferðafólks að ferðast um þessar slóðir að vetri til og ef ætlunin er að ganga þá þarf til þess 5 árstíða útbúnað.

NÆSTA NÁGRENNI

Auk þess að vera annaðhvort upphafs- eða endapunktur Kjalvegar hins forna eru fleiri gönguleiðir í nágrenninu. Hægt er að ganga í Karlsdrátt en til þess þarf að vaða Fúlukvísl og Fróðá, meðal annara.