Nýidalur

Smellið á bláa hnappinn hér uppi til hægri til að bóka skálagistingu.

Í Nýjadal á Sprengisandi eru tvö sæluhús og alls eru þar gistirými fyrir 54 manns.

AÐSTAÐA

Skálarnir tveir eru á tveimur hæðum og eru svipað uppbyggðir. Á jarðhæð er anddyri, vel búið eldhús og gistisalur með kojum. Á efri hæðinni eru svo svefnloft. Skálarnir eru olíukynntir.

Á sumrin er móttaka og upplýsingagjöf í öðrum skálanum en gistirýmið í sér skála.

Gott salernishús með sturtum er skammt frá skálunum og vetrarkamar er á bak við salernishúsið. Tjaldsvæðið er skammt frá.

Fyrsti skáli FÍ í Nýjadal var reistur árið 1967 og var upprunalega kallaður Tungnafell en nafnið hefur breyst í tímans rás.

Hér má sjá yfirlitsmynd af svæðinu.

OPNUN OG AÐGENGI

Að sumri til er hægt að aka á jeppum að skálanum eftir Sprengisandsleið (F26).

Opnun skálans yfir sumartímann helst í hendur við opnun Vegagerðarinnar á Sprengisandsleið og fer eftir snjóalögum og ástandi vegarins. Í meðalári má gera ráð fyrir því að skálinn sé opinn frá byrjun júlí og fram í september.

Skálinn er læstur yfir vetrartímann en hægt er að leigja hann og nálgast lykla með því að senda fyrirspurn á skrifstofu FÍ. Athugið að það er aðeins á færi reynslumikils ferðafólks að ferðast um þessar slóðir að vetri til og ef ætlunin er að ganga þá þarf til þess 5 árstíða útbúnað.

NÆSTA NÁGRENNI

Vinsælasta gönguleiðin á svæðinu er leiðin í Vonarskarð um Mjóháls.