Þverbrekknamúli

Smellið á bláa hnappinn hér uppi til hægri til að bóka skálagistingu.

Skálinn er við gönguleiðina um Kjalveg hinn forna.

AÐSTAÐA

Sæluhúsið í Þverbrekknamúla er hlýlegur skáli þar sem 20 manns geta sofið í 10 tvíbreiðum kojum.

Gengið er inn í anddyri og þaðan inn í opið rými sem hýsir bæði svefnaðstöðuna og eldhúsið. Langborð og stólar eru í miðju rýmisins.

Í eldhúsinu er rennandi vatn sem pumpað er í vaskinn úr tanki við húsið, gashellur og ágætt úrval eldhúsáhalda. Salernishús er rétt hjá og vetrarkamar uppi í hlíðinni fyrir aftan skálann.

Skálinn í Þverbrekknamúla var reistur árið 1980.

OPNUN OG AÐGENGI

Að sumri til er hægt að aka á jeppum langleiðina að skálanum. Fólki er ráðlagt að fara yfir Fúlukvísl á göngubrú og ganga síðasta spölinn að skálanum.

Opnun skálanna yfir sumartímann helst í hendur við opnun Vegagerðarinnar á Kjalvegi og fer eftir snjóalögum og ástandi vegarins.

Skálinn er læstur yfir vetrartímann en hægt er að leigja hann og nálgast lykla með því að senda fyrirspurn á skrifstofu FÍ. Athugið að það er aðeins á færi reynslumikils ferðafólks að ferðast um þessar slóðir að vetri til og ef ætlunin er að ganga þá þarf til þess 5 árstíða útbúnað.

NÆSTA NÁGRENNI

Auk þess að vera við Kjalveg hinn forna eru fleiri gönguleiðir í nágrenninu. Þar ber helst að nefna göngu á Hrútfell, en þaðan er gott útsýni. Gangan á Hrútfell er krefjandi.