Ferð: Garn, prjón og gönguskó

+10 myndir

Ert þú félagsmaður í FÍ Já Nei

Austurland

Garn, prjón og gönguskó

Sumarleyfisferð

Lýsing: Fjögurra daga bækistöðvarferð með gistingu í skála Ferðafélags Fljótdalshéraðs að Klyppstað í Loðmundarfirði. Áhersla er lögð á göngur, prjón, sögustundir og góða nærveru. Þátttakendur fá á fyrsta degi uppskrift að prjónaverkefni sem hver og einn vinnur á sínum hraða og eftir sinni getu í ferðinni.
Á fyrsta og fjórða degi þurfa þátttakendur að takast á við miðlungs krefjandi göngur og ef vel viðrar eru prjónarnir jafnvel einnig teknir upp í hléum. Á öðrum og þriðja degi er dvalið í skála, unnið við prjónaverkefnið og farið í léttar göngur.
Þátttakendur þurfa að vera í nokkuð góðri gönguþjálfun. Ferðin hentar vönum prjónurum og einnig algjörum byrjendum sem vilja fá kennslu. Eitt skylduprjónaverkefni er unnið og síðan er öllum frjálst að sinna eigin hannyrðum eins og þá langar til. Þátttakendur fá upplýsingar um hvaða garn þeir þurfa að hafa meðferðis og mæta einnig með sína prjóna.
Brottför/Mæting: kl. 09 frá Egilsstaðaflugvelli
Fararstjórn: Ingibjörg Jónsdóttir og Hildur Björk Guðmundsdóttir
Innifalið: Rútu, trúss, fararstjórn, prjónauppskrift og kennsla.

Búnaður

Pakkað fyrir trússferð eða bækistöðvarferð

Í trússaðri ferð er farangur fluttur á milli náttstaða svo aðeins þarf að bera nauðsynlegan búnað fyrir einn dag í einu í léttum dagpoka. Mat, svefnpoka og tilheyrandi er pakkað ofan í trússtösku og flutt í náttstað, sem getur ýmist verið tjaldstæði eða skáli.

Þó að ekki þurfi í trússferðum að skera allan útbúnað niður eins og þegar gengið er með allt á bakinu þá er nauðsynlegt að pakka naumt. Oftast er takmarkað pláss í trússbílum og bátum og pökkun þarf að taka mið af því.

Bækistöðvaferð er svipuð trússferðum en þá er gengið með dagpoka út frá sama náttstað allan tímann, tjaldi eða skála. Í bækistöðvaferðum er farangur ekki trússaður á milli náttstaða og hægt að vera enn frjálslegri í pökkun en í trússferðunum.

Athugið að listinn hér að neðan er ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar og hvort sofið er í skála eða tjaldi. Ef gengið er á milli skála eða dvalið í skála, þá má þar oftast finna eldunaraðstöðu og matarílát auk salernis eða kamars með klósettpappír.

Göngufatnaður

Góðir gönguskór og mjúkir göngusokkar
Nærföt, ull eða flís, eftir veðri
Peysa úr ull eða flís
Göngubuxur / stuttbuxur

Í dagpokanum

Bakpokahlíf / plastpoki inni í bakpokanum
Áttaviti, landakort og GPS tæki
Smurt nesti fyrir daginn
Göngunasl svo sem þurrkaðir ávextir, súkkulaði og hnetur
Vatnsbrúsi
Hitabrúsi með kakói, tei eða kaffi
Göngustafir
Myndavél og kíkir
Sólgleraugu
Sólarvörn og varasalvi
Hælsærisplástur, plástur, teygjubindi og verkjalyf
Salernispappír, blautþurrkur og litlir plastpokar fyrir notaðan pappír
Húfa, vettlingar og buff um hálsinn
Vind- og vatnsþéttur hlífðarfatnaður
Legghlífar, vaðskór og broddar, ef þurfa þykir

Í trússtöskunni

Svefnpoki og lítill koddi
Bolur til skiptana og til að sofa í
Auka nærbuxur og sokkar
Höfuðljós
Tannbursti og tannkrem
Sápa / sjampó
Lítið handklæði
Eyrnatappar
Skálaskór
Peningar

Núðlur eða pasta í pokum
Pulsur eða foreldaðar kjúklingabringur
Eitthvað gott á grillið
Kol og uppkveikilögur
Haframjöl
Brauð og flatkökur
Smjör og álegg, svo sem ostur, kæfa, hangikjöt
Hrökkbrauð og kex
Þurrkaðir ávextir, súkkulaði og hnetur
Kakó, te og/eða kaffi
Súpur
Krydd, t.d. salt og pipar

Ef sofið er í tjaldi þarf að auki í trússtöskuna

Tjald og tjalddýna
Prímus og eldsneyti
Eldspýtur
Pottur
Hitabrúsi og drykkjarbrúsi
Diskur og drykkjarmál
Hnífapör
Vasahnífur / skæri
Viðgerðasett, nál og tvinni, snæri og klemmur

Fróðleikur

Leiðarlýsing

1.d.,þriðjud. Rútan flytur hópinn frá Egilsstaðaflugvelli yfir í Borgarfjörð þar sem gangan hefst. Gengið verður um Kæjuskörð yfir í Loðmundarfjörð, þar sem við dveljum næstu þrjár nætur. Ganga: 14 km. Hækkun: 650 m. Göngutími: 7 klst.

2.d. Áður en lagt er af stað, er tekið í prjónana og rætt um göngu dagsins. Farið verður í létta göngu um Bárðarstaðadal, fossar og gamlar bæjarrústir skoðaðar. Baðað í hyl í Norðdalsá í lok göngunnar. Prjónar teknir upp á göngu ef veður leyfir. Að göngu lokinni eru prjónar teknir upp aftur í skála áður en hugað er að kvöldverði. Göngutími: 4 - 5 klst.

3.d. Eftir morgunverkin er gripið í prjónana áður en lagt er af stað í göngu dagsins. Gengið yfir í Sævarenda sem er sunnan megin við Fjarðará og stærsta æðarvarp landsins skoðað. Farið að Seljamýri norðan megin við Fjarðará, gamla höfnin skoðuð og einnig Hraunfossar í Hrauná. Síðan haldið tilbaka í skálann að Klyppsstað í gegnum hlaðið á Stakkahlíð. Baðað í hyl í Norðdalsá í lok göngunnar. Prjónar teknir upp á göngu ef veður leyfir. Eftir góða göngu og útiveru eru prjónarnir aftur teknir upp í skála og litið á afrakstur handverks hvers og eins. Göngutími: 4 - 5 klst.

4.d. Vöknum snemma, frágangur í skála. Gengið frá Loðmundarfirði yfir í Seyðisfjörð um Hjálmárdalsheiði. Rúta bíður hópsins á Seyðisfirði og keyrir hópinn upp á Egilsstaðaflugvöll þar sem farangur bíður okkar.
Ganga: 15 km. Hækkun: um 700 m. Göngutími: 7 klst.

Fleiri ferðir um Víknaslóðir sumarið 2024