Ferð: Ævintýri á Ströndum

+46 myndir
Ert þú félagsmaður í FÍ Já Nei

Ævintýri á Ströndum

Ferðafélag barnanna
Lýsing

Komdu með í ævintýraferð þar sem fjöll og haf mætast og hláturinn ómar í fjörunni!
Við gistum í notalegum skála Ferðafélags Íslands á Valgeirsstöðum, með útsýni yfir fjörðinn og á sjálfa Reykjarneshyrnu. Dagarnir eru fullir af spennandi gönguferðum, leikjum í fjörunni og sundi í Krossneslaug. Á kvöldin tökum við fram spilin, segjum sögur, spinnum leikrit og eigum skemmtilega kvöldstund í skálanum áður en við skríðum í svefnpokana.
Ævintýri, vinátta og náttúra, allt í einni ferð.

Hægt að greiða ferðir með raðgreiðslum eða netgíró.
Vinsamlegast hafið samband við skrifstofu ef óskað er eftir greiðsludreifingu

Brottför/Mæting
Kl. 15 á einkabílum að Valgeirsstöðum í Norðurfirði.
Fararstjórn

Steinunn Leifsdóttir og Jóhann Aron Traustason

Innifalið
Gisting og farastjórn.

Búnaður

Pakkað fyrir trússferð eða bækistöðvarferð

Í trússaðri ferð er farangur fluttur á milli náttstaða svo aðeins þarf að bera nauðsynlegan búnað fyrir einn dag í einu í léttum dagpoka. Mat, svefnpoka og tilheyrandi er pakkað ofan í trússtösku og flutt í náttstað, sem getur ýmist verið tjaldstæði eða skáli.

Þó að ekki þurfi í trússferðum að skera allan útbúnað niður eins og þegar gengið er með allt á bakinu þá er nauðsynlegt að pakka naumt. Oftast er takmarkað pláss í trússbílum og bátum og pökkun þarf að taka mið af því.

Bækistöðvaferð er svipuð trússferðum en þá er gengið með dagpoka út frá sama náttstað allan tímann, tjaldi eða skála. Í bækistöðvaferðum er farangur ekki trússaður á milli náttstaða og hægt að vera enn frjálslegri í pökkun en í trússferðunum.

Athugið að listinn hér að neðan er ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar og hvort sofið er í skála eða tjaldi. Ef gengið er á milli skála eða dvalið í skála, þá má þar oftast finna eldunaraðstöðu og matarílát auk salernis eða kamars með klósettpappír.

Göngufatnaður

  • Góðir gönguskór og mjúkir göngusokkar
  • Nærföt, ull eða flís, eftir veðri
  • Peysa úr ull eða flís
  • Göngubuxur / stuttbuxur

Í dagpokanum

  • Bakpokahlíf / plastpoki inni í bakpokanum
  • Áttaviti, landakort og GPS tæki
  • Smurt nesti fyrir daginn
  • Göngunasl svo sem þurrkaðir ávextir, súkkulaði og hnetur
  • Vatnsbrúsi
  • Hitabrúsi með kakói, tei eða kaffi
  • Göngustafir
  • Myndavél og kíkir
  • Sólgleraugu
  • Sólarvörn og varasalvi
  • Hælsærisplástur, plástur, teygjubindi og verkjalyf
  • Salernispappír, blautþurrkur og litlir plastpokar fyrir notaðan pappír
  • Húfa, vettlingar og buff um hálsinn
  • Vind- og vatnsþéttur hlífðarfatnaður
  • Legghlífar, vaðskór og broddar, ef þurfa þykir
  • Hleðslubanki

Í trússtöskunni

  • Svefnpoki og lítill koddi
  • Bolur til skiptana og til að sofa í
  • Auka nærbuxur og sokkar
  • Höfuðljós
  • Tannbursti og tannkrem
  • Sápa / sjampó
  • Lítið handklæði
  • Eyrnatappar
  • Skálaskór
  • Peningar
  • Núðlur eða pasta í pokum
  • Pulsur eða foreldaðar kjúklingabringur
  • Eitthvað gott á grillið
  • Kol og uppkveikilögur
  • Haframjöl
  • Brauð og flatkökur
  • Smjör og álegg, svo sem ostur, kæfa, hangikjöt
  • Hrökkbrauð og kex
  • Þurrkaðir ávextir, súkkulaði og hnetur
  • Kakó, te og/eða kaffi
  • Súpur
  • Krydd, t.d. salt og pipar

Ef sofið er í tjaldi þarf að auki í trússtöskuna

  • Tjald og tjalddýna
  • Prímus og eldsneyti
  • Eldspýtur
  • Pottur
  • Hitabrúsi og drykkjarbrúsi
  • Diskur og drykkjarmál
  • Hnífapör
  • Vasahnífur / skæri
  • Viðgerðasett, nál og tvinni, snæri og klemmur

Ferðalýsing

1.d. fimmtud. Komið að Valgeirsstöðum um kl. 15. Allir koma sér fyrir og heilsa nýjum ferðafélögum. Sundferð í Krossneslaug.

2.d. Ekið inn í Ingólfsfjörð og bílunum lagt við bryggjuna. Þar verður svo gengið upp Ingólfsfjarðarbrekku, niður Hádegislægðir og þaðan inn í Ófeigsfjörð. Á þessari leið sést vel yfir báða firðina og Ófeigsfjarðarheiðina. Í Ófeigsfirði skoðum við Húsárfoss, kíkjum í fjöruna og göngum svo til baka yfir í Ingólfsfjörð. Fyrir þá sem það kjósa verður hægt að keyra beint inn í Ófeigsfjörð. Eftir langan dag er fátt betra en gott bað í lauginni. Ganga: 10 km. Samanlögð hækkun: 500 m, Göngutími: 6–7 klst.

3.d. Gengið á Urðartind og Töflu þaðan sem útsýnið er stórkostlegt. Ganga: 5 km, samanlögð hækkun 400 m, áætlaður tími 3 klst. Dagurinn heldur áfram með fjöruleikjum, þar sem keppt verður í ýmsum þrautum í fjörunni og ef veður leyfir er jafnvel hægt að dýfa sér í sjóinn. Sundferð í Krossneslaug. Grillveisla og kvöldgleði.

4.d. Hópurinn gengur frá skálanum, pakkar saman og yfirgefur skálann um kl. 10. Síðasta ganga ferðarinnar er stutt og þægileg ganga á einkennisfjall Norðurfjarðar, Reykjaneshyrnu.
Ganga: 2,5 km, Samanlögð hækkun: 150 m. Göngutími 1,5 klst. Kveðjustund og ferðalok

Aðrar ferðir á Strandir sumarið 2026