Straumnesfjall, Aðalvík og Hesteyri
- Lýsing
Hefur þig dreymt um komast á Hornstrandir og uppgötva undur friðlandsins án þess að bera allt á bakinu? Sofa í góðum húsum og gera vel við þig í mat, heyra spennandi sögur af svæðinu og fá nasasjón af menningu og mannlífi? Skoða minjar um kalda stríðið á sjálfum heimsenda og horfast í augu við íslenska heimskautarefinn?
Þetta er allt hægt í „snerpuferð“ þar sem sofið er í tvær nætur í friðlandinu á Hornströndum í góðum húsum og gengið um fjörur og fjöll. Tveir af helstu þéttbýliskjörnum Hornstranda eru heimsóttir, Aðalvík og Hesteyri og Straumnesfjallið rannsakað sem hýsti hundruð hermanna í Kalda stríðinu.
Þátttakendur koma til Ísafjarðar/Bolungarvíkur föstudaginn 9. ágúst og gista þar á eigin vegum.- Brottför/Mæting
- kl. 8:30 við bátabryggjuna í Bolungarvík. Brottför Kl. 9
- Fararstjórn
- Innifalið
- Sigling, gisting, matur á Hesteyri og fararstjórn.
Búnaður
Pakkað fyrir trússferð eða bækistöðvarferð
Í trússaðri ferð er farangur fluttur á milli náttstaða svo aðeins þarf að bera nauðsynlegan búnað fyrir einn dag í einu í léttum dagpoka. Mat, svefnpoka og tilheyrandi er pakkað ofan í trússtösku og flutt í náttstað, sem getur ýmist verið tjaldstæði eða skáli.
Þó að ekki þurfi í trússferðum að skera allan útbúnað niður eins og þegar gengið er með allt á bakinu þá er nauðsynlegt að pakka naumt. Oftast er takmarkað pláss í trússbílum og bátum og pökkun þarf að taka mið af því.
Bækistöðvaferð er svipuð trússferðum en þá er gengið með dagpoka út frá sama náttstað allan tímann, tjaldi eða skála. Í bækistöðvaferðum er farangur ekki trússaður á milli náttstaða og hægt að vera enn frjálslegri í pökkun en í trússferðunum.
Athugið að listinn hér að neðan er ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar og hvort sofið er í skála eða tjaldi. Ef gengið er á milli skála eða dvalið í skála, þá má þar oftast finna eldunaraðstöðu og matarílát auk salernis eða kamars með klósettpappír.
Göngufatnaður
- Góðir gönguskór og mjúkir göngusokkar
- Nærföt, ull eða flís, eftir veðri
- Peysa úr ull eða flís
- Göngubuxur / stuttbuxur
Í dagpokanum
- Bakpokahlíf / plastpoki inni í bakpokanum
- Áttaviti, landakort og GPS tæki
- Smurt nesti fyrir daginn
- Göngunasl svo sem þurrkaðir ávextir, súkkulaði og hnetur
- Vatnsbrúsi
- Hitabrúsi með kakói, tei eða kaffi
- Göngustafir
- Myndavél og kíkir
- Sólgleraugu
- Sólarvörn og varasalvi
- Hælsærisplástur, plástur, teygjubindi og verkjalyf
- Salernispappír, blautþurrkur og litlir plastpokar fyrir notaðan pappír
- Húfa, vettlingar og buff um hálsinn
- Vind- og vatnsþéttur hlífðarfatnaður
- Legghlífar, vaðskór og broddar, ef þurfa þykir
Í trússtöskunni
- Svefnpoki og lítill koddi
- Bolur til skiptana og til að sofa í
- Auka nærbuxur og sokkar
- Höfuðljós
- Tannbursti og tannkrem
- Sápa / sjampó
- Lítið handklæði
- Eyrnatappar
- Skálaskór
- Peningar
- Núðlur eða pasta í pokum
- Pulsur eða foreldaðar kjúklingabringur
- Eitthvað gott á grillið
- Kol og uppkveikilögur
- Haframjöl
- Brauð og flatkökur
- Smjör og álegg, svo sem ostur, kæfa, hangikjöt
- Hrökkbrauð og kex
- Þurrkaðir ávextir, súkkulaði og hnetur
- Kakó, te og/eða kaffi
- Súpur
- Krydd, t.d. salt og pipar
Ef sofið er í tjaldi þarf að auki í trússtöskuna
- Tjald og tjalddýna
- Prímus og eldsneyti
- Eldspýtur
- Pottur
- Hitabrúsi og drykkjarbrúsi
- Diskur og drykkjarmál
- Hnífapör
- Vasahnífur / skæri
- Viðgerðasett, nál og tvinni, snæri og klemmur
Fróðleikur
Eftirfarandi árbók fjallar um svæðið og hana er hægt að kaupa í vefverslun okkar.
Leiðarlýsing
1.d., laugard. Siglt í Aðalvík. Um leið og gengið er á land að Látrum í Aðalvík er haldið á Straumnesfjall þar sem merkar minjar um veru Bandaríkjahers eru skoðaðar og ýmsar sögur rifjaðar upp sem tengjast veru hersins á fjallinu. Sögur sagðar af svæðinu og af ábúendum. Gist í Stakkadal í Aðalvík.
2.d. Gengið úr Stakkadal í Aðalvík yfir heiðina og Hesteyrarskarð til Hesteyrar. Gist er í Læknishúsinu þar sem boðið er upp á vellystingar. Saga staðarins er rakin og fjölmargar persónur úr fortíðinni lifna við í spennandi sögum fararstjóra.
3.d. Hvalstöðin og kirkjugarðurinn skoðuð auk þess sem vikið verður að menningu og mannlífi áður en siglt er síðdegis yfir Djúpið til Bolungarvíkur.
Fleiri ferðir á Hornstrandir sumarið 2024
- 4. - 7. maí. Fjallaskíðaferð a´ Hornstrandir
- 13. - 17. júní. Ylur og birta í Hornbjargsvita: Vinnuferð
- 23. -25. júní. Sæból í Aðalvík, Hesteyri og Kagrafell
- 27. - 30. júní. Hinar einu sönnu Hornstrandir I
- 10. - 14. júlí. Randað um Reykjarfjörð
- 25. - 28. júlí. Hinar einu sönnu Hornstrandir II