Fréttir úr starfi félagsins

Bókin Gönguleiðir við Hornafjörð er 22. titill í ritröð Ferðafélags Íslands. Höfundur texta er Rannveig Einarsdóttir fyrrverandi formaður Ferðafélags A - Skaftefllinga. Umhverfi Hornafjarðar býður upp á margar skemmtilegar gönguleiðir. Svæðið sem fjallað er um er aðgengilegt og kemur á óvart hve margar mismunandi leiðir er þar að finna. Í ritinu eru 27 leiðir, sem eru miskrefjandi og margar þeirra færar allt árið. Bókin er skrifuð með það að leiðarljósi, að fólk sem ekki hefur verið að stunda hreyfingu úti stígi út fyrir þægindarammann og drífi sig út. Það er von Ferðafélags Íslands að ritið verði góður ferðafélagi í átt að meiri hreyfingu, útiveru og betri lífsgæðum.

Búið er að opna veginn í Landmannalaugar og skálaverðir FÍ mættu til starfa fyrir þó nokkru síðan og hófu undirbúning fyrir opnun. Vegurinn er að mestu ágætur en Námskvíslin og Laugapollurinn sérstaklega hefur verið leiðinlegur og aðeins verið fær jeppum.

Búið er að opna skála FÍ í Langadal og skálavörður mættur til starfa. Skálafólk FÍ mætti til starfa í Langadal um sl. helgi og eitt af fyrstu verkefnum þeirra var að koma göngubrú FÍ á sinn stað yfir Krossá. Útlit er fyrir að skálar FÍ á hálendinu fyrr en oft áður eftir frekar snjóléttan vetur en Vegagerðin og Umhverfisstofnun gefa á næstu vikum nánari upplýsingar um opnun vega og svæða á hálendinu.

Ferðafélag Íslands, World Class og Fjallakofinn standa fyrir fjölskyldugöngu á Úlfarsfell þann 18 mai nk. kl. 18.00. Um er að ræða skemmtigöngu þar sem Helgi Björnsson og reiðmenn vindanna mæta og syngja og skemmta fólki á Hákinn, sléttunni undir hæsta hluta fjallsins . Forseti Íslands, Guðni Th. Jóhannesson er heiðursgestur í göngunni.

Hinar árlegu morgungöngur Ferðafélags Íslands hefjast mánudaginn 1. mai.

„Markmiðið með Ferðafélagi barnanna hefur ávallt verið að skapa skemmtilegan vettvang fyrir börn og fjölskyldur þeirra til að njóta útiveru, takast á við nýjar og spennandi áskoranir og hafa einafaldlega gaman af því að leika sér úti.“ Þetta segir Hrönn Vilhjálmsdóttir sem nú leiðir starf Ferðafélags barnanna innan FÍ, ásamt manni sínum Herði Harðarssyni. Óhætt er að segja að þessi uppskrift að félagsskap hafi virkað með stæl því starfið hefur notið mikilla vinsælda frá fyrsta degi. Þau eru því orðin býsna mörg börnin sem hafa sótt lengri og skemmri ferðir á vegum Ferðafélags barnanna.