Vörðufell á Skeiðum

Lýsing

Notaleg haustganga á Vörðufell á Skeiðum, fallegt útsýnisfjall í nágrenni Skálholts og Laugaráss. Þótt fjallið sé ekki hátt er víðsýnt af því og landslagið fjölbreytt.

Vörðufell er áberandi fjall þegar farið er um Árnessýslu. Það er 391 m yfir sjó og er staðsett sunnan Hvítár en er bæði á Skeiðum og í Biskupstungum. Fellið er þríhyrningslaga og er hæsti hnúkurinn á suð austur endanum. Þó það sé ekki hátt er mikil útsýn þegar upp er komið og fallegar gönguleiðir á fjallið og margt að sjá. Uppi á fjallinu liggur lítið vatn í kvos sem heitir Úlfsvatn.

Gengið verður um gróið og fallegt svæði. Nokkur hækkun er í upphafi en síðan verður genginn hringur uppi á fjallinu og umhverfis Úlfsvatn, lítið vatn sem liggur í kvos á fjallinu.
Gott er að hafa með sér nesti og eitthvað heitt á brúsa.

Að göngu lokinni geta þeir sem vilja lengt daginn örlítið og skellt sér í Skeiðalaug í Brautarholti eða slakað á í Laugarás Lagoon.

Brottför/Mæting

Upphaf göngu er kl. 11:00. Nákvæm staðsetning og leið að upphafsstað verður send þátttakendum fyrir ferð.

Fararstjórn

Bergur Pálsson

Innifalið

Fararstjórn

Búnaður

Pakkað fyrir dagsferð

Dagsferðir eru mismunandi og geta tekið frá örfáum klukkustundum upp í hálfan sólarhring.  Listinn hér að neðan er því ekki tæmandi, heldur aðeins til viðmiðunar. Endanlegur búnaður fer eftir persónulegum þörfum, lengd ferðar, veðri og árstíma.

Göngufatnaður

• Góðir gönguskór og mjúkir göngusokkar
• Nærföt, ull eða flís, eftir veðri
• Peysa úr ull eða flís
• Göngubuxur / stuttbuxur

Í dagpokanum

• Bakpokahlíf / plastpoki inni í bakpokanum
• Áttaviti, landakort og GPS tæki
• Smurt nesti fyrir daginn
• Göngunasl svo sem þurrkaðir ávextir, súkkulaði og hnetur
• Vatnsbrúsi
• Hitabrúsi með kakói, tei eða kaffi
• Höfuðljós
• Göngustafir
• Myndavél og kíkir
• Sólgleraugu / skíðagleraugu
• Sólarvörn og varasalvi
• Hælsærisplástur, plástur, teygjubindi og verkjalyf
• Salernispappír, blautþurrkur og litlir plastpokar fyrir notaðan pappír
• Húfa, vettlingar og buff um hálsinn
• Vind- og vatnsþéttur hlífðarfatnaður
• Legghlífar, vaðskór og broddar, ef þurfa þykir
• Hleðslubanki