Eyjar í hraunahafi
Gönguleiðir milli hringvegar á Hellisheiði, Suðurstrandavegar og Bláfjalla

Eftir Sigurð Kristinsson

Í þessu fræðsluriti FÍ er fjallað um gönguleiðir á svæði frá hringvegi á Hellisheiði að Selvogi og Bláfjöllum. Þrengslavegur skiptir svæðinu í tvennt. Meðal annars eru hér gönguleiðir um Jósefsdal, Lambafell, Stóra-Meitil, Skálafell og Geitafell svo fátt eitt sé nefnt. 

Mikil hraun hafa runnið á þessu svæði og því eru fell og fjöll eins og eyjar í hraunahafinu. Á þessum slóðum er fjöldamargt áhugavert að sjá og skoða á leiðum sem eru fáfarnar en liggja þó svo nærri byggð að ekki tekur nema örskotsstund að koma sér á upphafsstað göngu. Í bókinni er meðal annars bent á hægustu leiðir á fell og um hraun og gömlum leiðum milli byggða eru gerð skil.

Höfundur ritsins, Sigurður Kristinsson, er einn af reyndustu fararstjórum Ferðafélags Íslands og er gagnkunnugur gönguleiðum á suðvesturhorninu.

Kaflar í bókinni

• Milli hringvegar og Þrengslavegar
  • Skálafell og Hálsar
  • Lakahnúkar
  • Meitlar
  • Lakastígur - Lágaskarðsvegur
  • Lakastígur - Suðurhálsar
• Aðrar gönguleiðir á afrétti Hjallasóknar
  • Núpafjall - Þurárhnúkur
  • Suðurferðagata eða Skógarvegur
  • Þrengslaleið
• Vestan Þrengslavegar
  • Lambafell
  • Krossfjöll og Dimmadalshæð
  • Geitafell
  • Ólafsskarðsvegur
  • Blákollur - Sauðadalahnúkar - Ólafsskarð
  • Vegir milli hrauna og hlíða
  • Breyttar leiðir vegna nýrra hrauna
  • Breyttar gönguleiðir vegna nýrra akvega