Fréttir

Út er komin bókin 1001 þjóðleið eftir Jónas Kristjánsson hestamann, ferðafélaga og fyrrverandi ritstjóra.  Bókin er afar glæsileg og án ein allra besta ferðabók sem út hefur komið á síðari árum.  Í bókinni er yfir 1.000 göngu- og reiðleiðum lýst og þær sýndar á vönduðum kortum. Stafrænn diskur sem gerir kleift að hlaða leiðunum inn í GPS-tæki fylgir.

Laugardaginn 12. nóv. var farin síðasta gangan á þessu ári sem verið hefur í samvinnu FÍ og HÍ í tilefni aldarafmælis Háskóla Íslands. Heiti ferðarinnar var Tugthúsmeistarinn, strípibúllur og fyrsti dómsalurinn og leiddi prófessor Helgi Gunnlaugsson hópinn um refilstigu borgarinnar og fræddi okkur um ýmislegt sem tengist þessum málaflokki.   Gangan hófst við Stjórnarráð Íslands, sem var byggt um 1770 sem tugthús og rakti Helgi þróun refsilaga og fræddi okkur um sögu hússins. Þaðan var gengið út á Austurvöll og rifjuð upp saga bjórbannsins og strípibúlla borgarinnar.  Þá lá leiðin upp á Skólavörðustíg að gamla Hegningarhúsinnu sem tekið var í notkun 1874. Þar var okkur boðið inn og þáðu það allir þó með þeim orðum að við kæmumst væntanlega út aftur ! Guðmundur Gíslason fangelsisstjóri tók á móti hópnum í gamla bæjarþingssalnum og fræddu þeir Helgi okkur um sögu hússins og þá margvíslegu starfsemi sem verið hefur þar.   Göngunni lauk um kl 15:30 og tóku um 120 manns þátt í henni í einstaklega góðu haustveðri.      

Ferðanefnd FÍ hefur nú skilað ferðaáætlun félagsins fyrir 2012 til lokafrágangs á skrifstofu.  Sigrún Valbergsdóttir formaður ferðanefndar segir ferðaáætlunin sé svipað uppbyggð og undanfarin ár, alltaf sé eitthvað um nýungar inn á milli sígildra ferða.

12. nóvember verður ganga með Helga Gunnlaugssyni, prófessor við Félags-og mannvísindadeild Háskóla Íslands. Gangan hefst kl. 14:00 við Stjórnarráðshúsið við Lækjargötu sem einu sinni var notað sem fangageymsla. Gengið verður um miðbæinn framhjá sögufrægum öldurhúsum og endað í Hegningarhúsinu við Skólavörðustíg þar sem fyrsti dómsalurinn er til húsa. Stutt kynning á því sem fyrir augu ber á hverum stað.                                                 

Helgarferð frá föstudegi til sunnudags þar sem farið verður í gönguferðir og stjörnuskoðun. Aðventustemmning með jólaföndri og kvöldvöku þar sem sagðar verða hrekkjasögur af jólasveinum. Lagt af stað frá Mörkinni 6 kl. 18.00. Verð kr. 10.000 fyrir fullorðin , 5.000kr fyrir barn, fjölskylduverð kr.20.000. Innifalið: rúta,gisting,föndurefni og fararstjórn. Þátttakendur taka með sér nesti og góðan búnað.

Gengið frá Nauthólmsvík að Perlunni með blys. Jólasveinar verða á svæðinu. Þátttaka ókeypis, allir velkomnir. Nánar auglýst síðar.

Markmið Ferðafélags barnanna er að hvetja börn og foreldra til að njóta útiveru og náttúru.  Jafnframt að leiðbeina um búnað, öryggismál og fleira sem þarf að hafa í huga þegar ferðast er um náttúru landsins.  Ekki síst að leika sér og hafa gaman saman.  Ef þú hefur áhuga á að stofna deild í Ferðafélagi barnanna á þínu svæði og standa fyrir skemmtilegum fjölskyldugöngu á þínu svæði þá veitir skrifstofa FÍ aðstoð.

Ferðafélag barnanna var stofnað árið 2009 að fyrirmynd norska Ferðafélagsins DNT. Nú sem aldrei fyrr er nauðsynlegt að hlúa að heilbrigði og virkni allra barna og fjölskyldna og með stofnun Ferðafélags barnanna leggur Ferðafélag Íslands sitt lóð á vogarskálarnar. Með þessu nýja félagi verður lögð áhersla á að bjóða upp á ferðir og uppákomur á forsendum barnanna með það fyrir augum að víkka sjóndeildarhring þeirra og upplýsa um heilbrigða lífshætti úti í náttúrunni.

VÍS og Ferðafélag Íslands, FÍ, hafa gert með sér samstarfssamning fyrir næstu þrjú ár eða til ársins 2014. VÍS verður með þessum samningi einn af aðalstyrktaraðilum FÍ og einn af bakhjörlum Ferðafélags barnanna hjá FÍ.

Með fróðleik í fararnesti – gönguferðir Háskóla Íslands og Ferðafélags Íslands Á aldarafmæli Háskóla Íslands taka skólinn og Ferðafélag Íslands höndum saman og standa fyrir gönguferðum reglulega yfir afmælisárið. Reynsla og þekking leiðsögumanna ferðafélagsins og þekking kennara og vísindamanna háskólans blandast saman í áhugaverðum gönguferðum um höfuðborgarsvæðið og næsta nágrenni þess. Gönguferðirnar verða 12 talsins og taka hver um 2 klukkustundir. Markmið samstarfs Háskóla Íslands og Ferðafélags Íslands er að færa almenningi afmælisgjöf sem felst í fræðslu og hollri útivist. Um leið er vakin athygli og áhugi á fjölbreyttri starfsemi Háskóla Íslands og Ferðafélags Íslands. Þátttaka er ókeypis, allir velkomnir.  Ekki þarf að skrá sig fyrirfram Hvers virði er náttúran? 29. október mun Daði Már Kristófersson, dósent í náttúruauðlindahagfræði við Hagfræðideild Háskóla Íslands, ganga um Heiðmörkina og tala um verðmæti náttúrunnar. Gangan hefst við Elliðavatnsbæinn kl. 14:00.