Fréttir

Á aldarafmæli Háskóla Íslands taka skólinn og Ferðafélag Íslands höndum saman og standa fyrir gönguferðum reglulega yfir afmælisárið. Reynsla og þekking leiðsögumanna ferðafélagsins og þekking kennara og vísindamanna háskólans blandast saman í áhugaverðum gönguferðum um höfuðborgarsvæðið og næsta nágrenni þess. Gönguferðirnar verða 12 talsins og taka hver um 2 klukkustundir. Markmið samstarfs Háskóla Íslands og Ferðafélags Íslands er að færa almenningi afmælisgjöf sem felst í fræðslu og hollri útivist. Um leið er vakin athygli og áhugi á fjölbreyttri starfsemi Háskóla Íslands og Ferðafélags Íslands. Þátttaka er ókeypis, allir velkomnir.  Ekki þarf að skrá sig fyrirfram Skólaganga 10. september leiðir Helgi Skúli Kjartansson, prófessor við Kennaradeild Háskóla Íslands, gönguferð um slóðir menntunar og fræðslu í höfuðborginni. Gönguferðin hefst kl. 14:00 gatnamót Pósthússtrætis og Hafnarstrætis þar sem Barnaskóli Reykjavíkur var áður til húsa.

Eins og fram hefur komið í fjölmiðlum í sumar hefur Ferðafélag Íslands  fest kaup á Húsadal, skálasvæði í Þórsmörk og tekur við rekstri svæðisins frá og með næstu áramótum.  Öll aðstaða og þjónusta sem verið hefur í Húsadal verður áfram í boði og markmið félagsins er að styrkja enn frekar bæði aðstöðu og þjónustu á svæðinu.  Sú uppbygging mun hefjast þegar næsta vor.  

  Mannlífið í Landmannalaugum er að jafnaði afar litríkt og fjölbreytt. En línudans að morgni dags fyrir fjallgöngu hafði ekki sést þar áður fyrr en nú um helgina. Þar var á ferð hinn lífsglaði og skrautlegi 52 fjalla hópur á vegum Ferðafélags Íslands að safna fjöllum. Fimm tindar voru sigraðir um helgina en áður en lagt var á brattann á Bláhnúk á sunnudagsmorgni stjórnaði einn úr hópnum, Davíð Örn Kjartansson, línudansi á planinu fyrir utan.Þar var dansað af krafti og tónlistin bergmálaði í fjöllunum umhverfis Laugar sem skörtuðu sínu fegursta í stilltu haustveðri og sólskini. 88 göngugarpar fóru alsælir heim eftir að hafa smitast fyrir lífstíð af töfrum náttúrunnar á þessu fagra svæði.

Haustferð FÍ 17. - 18 september þar sem ekið er í rútu í Emstrur og gengið í Þórsmörk, lokaáfanginn á Laugaveginum,  Grillveisla og haustlitir í Þórsmörk.

Óvissuferð FÍ er um næstu helgi. Mikil óvissa hvílir yfir ferðaáætlun og taldi farastjóri líklegast að hann færi út og suður en líklega ekki norður og niður, hann var þó ekki viss.

Á Esjudaginn 28. ágúst nk. verður ratleikur í tilefni dagsins.  Hundrað þúsund krónum verður komið fyrir í Esjuhlíðum i 20 fjársjóðapokum. Sá á fund sem finnur.  Finnst loksins silfur Egils sem hann faldi fyrir 1000 árum. Allir fá miða með upplýsingum um ratleikinn eftir setningu Esjudags á sunnudag kl. 13.

Hluti af dagskrá Esjudagsins er kvöldganga á Þverfellshorn með Ólafi Erni Haraldssyni forseta FÍ. Kvöldganga er að kveldi laugardags 27. ágúst og hefst kl. 20.30 frá Esjustofu.  Ef aðstæður eru góðar mun kvöldsólin baða hafflötin við sjónarrönd gulrauðum roða og á bakaleiðinni sjáum við ljósin í bænum vakna við undirspil mána og stjarna.

Esjudagur FÍ og Valitor er haldinn sunnudaginn 28. ágúst nk.  Ingó veðurguð mætir í gönguferð með Ferðafélagi barnanna og stjórnar brekkusöngi í fyrstu búðum Esjunnar sem settar hafa verið upp í tilefni dagsins. Þátttaka er ókeypis og allir velkomnir.  Takið með ykkur nesti og nýja skó.

Esjudagur FÍ og Valitor er haldinn sunnudaginn 28. ágúst nk.  Ferðafélag Íslands býður upp á gönguferðir með fararstjórum í tilefni dagsins. Meðal annars er boðið upp á fjölskyldugöngu með Ferðafélagi barnanna að fyrstu búðum, skógargöngu með skógræktarfélagi Reykjavikur, kappgöngu að Steini,  göngu á Þverfellshorn og morgungöngu á Móskarðshnúka með framkvæmdastjóra FÍ.

Esjudagur FÍ og Valitor er haldinn sunnudaginn 28. ágúst nk.  Maximus Músikus mætir í Esjuna ásamt tónlistarmönnum úr Sinfóníuhljómsveti Íslands og spilar fyrir unga fólkið í ,,fyrstu búðum" í Esjunni sem settar verða upp í tilefni dagsins. Maximus Múskikus hefur slegið í gegn hjá Sinfóníuhlljómsveitinni og verður án efa glaður að komast út í náttúruna.