Fréttir

FÍ fjör í Esjunni - vertu til er vorið kallar á þig er hafið en það felst í því að ganga á Esjuna fjóra daga í röð. Í gær, þriðjudag  fór hópurinn upp í allhvössum vindi en ágætlega björtu veðri. Mönnum þótti talsvert streð að baksa upp með vindinn í fangið og var því látið nægja að fara upp að Steini. Í dag miðvikudag verður haldið áfram og ástæða til að hvetja fólk til að mæta í þetta hressilega verkefni. Veðurspáin fyrir daginn er áhugaverð, spáð er norðlægri átt og síðdegis gæti orðið einhver ofankoma.  En gott skap og hlýr fatnaður er rétta veganestið í fjallgöngur að vetri.  Fararstjóri er Þórður Marelsson.  Lagt er af stað frá Esjustofu kl. 18 alla daga.  Takið með ykkur höfuðljós og góðan búnað. 

Sl. ár stóð Ferðafélag Íslands fyrir verkefni þar sem þátttakendur söfnuðu fjöllum í til þess gerða Fjallabók FÍ.  Nú hefur póstkassinn sem hefur að geyma allar Fjallabækur ársins 2009 verið opnaður og er nöfn þátttakenda og þeirra sem skráðu niður 10 fjöll sem þeir gengu á árinu að finna hér að neðan.  Þáttakendur fá í verðlaun FÍ buff, FÍ spilastokk og fræðslurit að eigin vali. Aðalheiður Stefánsdóttir, Anna Lára Eðvarðsdóttir, Borgþór Harðarson, Corina Hoffmann, Elínborg Kristinsdóttir, Erlingur Jensson, Fanney Bj. Karlsdóttir, Halla Rún Erlingsdóttir, Hanna María Þorgeirsdóttir, Heiðdís Lilja Erlingsdóttir, Ingibjörg Sveinsdóttir, Jónína Pálsdóttir, Katrín Haraldsdóttir, Margrét Hallgrímsdóttir, Ómar Smári Kristinsson, Sigríður Lóa Jónsdóttir, Sigurður E. Kristjánsson, Snæfríður M. Björnsdóttir, Sveinn B. Sveinsson, Trausti Sigurðsson, Þórhallur Hálfdánarson.

Páll Ásgeir Ásgeirsson stjórnarmaður í Ferðafélagi Íslands og fararstjóri er atkvæðamikill bloggari og birtast skrif hans á vefsvæðinu Eyjunni. Undanfarna daga hafa birst þar nokkrar færslur þar sem fjallað er um náttúruvernd og utanvegaakstur í víðu samhengi, viðhorf manna til náttúrunnar og verndar hennar. Snarpar umræður hafa orðið í athugasemdakerfi síðunnar þar sem sitt sýnist hverjum en ljóst af viðbrögðum að hér er á ferðinni málefni sem fólki er mjög hugfólgið. "Mér finnst vert að reyna að ræða þessi mál og reyna að vekja fólk til umhugsunar," sagði Páll Ásgeir í samtali við heimasíðu FÍ. Slóðin á bloggsíðu Páls Ásgeirs http://blog.eyjan.is/pallasgeir/ og þar geta áhugasamir lesið umræddar færslur.

FÍ fjör í Esjunni - vertu til er vorið kallar á þig er hafið en það felst í því að ganga á Esjuna fjóra daga í röð. Í gær, mánudag fór fyrsti hópurinn upp í köldu veðri en ágætlega björtu. Flestir létu nægja að fara upp að Steini en nokkrir fóru alla leið upp á brún. Í dag og næstu daga verður haldið áfram og ástæða til að hvetja fólk til að mæta í þetta hressilega verkefni. Veðurspáin fyrir daginn er ágæt, spáð er norðan vindi og 2 stiga frosti. Frostið eykst eftir því sem ofar dregur og nokkur vindur var í fjallinu í gær og má gera ráð fyrir svipuðu veðri í dag. En gott skap og hlýr fatnaður er rétta veganestið í fjallgöngur að vetri.  Fararstjóri er Þórður Marelsson.  Lagt er af stað frá Esjustofu kl. 18 alla daga.  Takið með ykkur höfuðljós og góðan búnað. 

,,Ég var að springa úr mæði á leiðinni upp en að springa úr monti á leiðinni niður," sagði stoltur göngugarpur nýkominn af tindi Móskarðshnúka í gönguhópi Austurbæinga í verkefninu Eitt fjall á viku.  Gengið var á hæsta tind Móskarðshnúka  og útsýni fjallahringsins stórkostlegt í frosnum himni. Þegar niður var komið biðu ástarpungar og kleinur göngumanna.   Þrír fjallahópar FÍ gengu á fjöll í gærdag, Austurbær gekk á Móskarðshnúka, Vesturbær gekk á Skálafell og Nágrannar gengu á  Húsfell, alls um 150 manns.   Sjá myndir í myndabanka FÍ með því að smella á nöfn hópanna.

Fjallaskíðanámskeið,1 dagur2 námskeið  27 og 28 febrúar. Mæting í Mörkinni kl 08:00 Einn dagur á fjöllum þar sem að farið er yfir grunn þætti fjallaskíðamennsku s.s mat á snjóflóðahættu, snjóflóðaleit, uppsetningu á öruggri leið og almenna vetrarfjallamennsku. Þetta örnámskeið er ætlað sem verkleg kynning á sportinu og fer fram í nágrenni borgarinnar þar sem aðstæður eru bestar á þeim tímapunkti. Fjallaskíða og öryggisbúnaður fæst leigður á staðnum fyrir þá sem ekki eiga. Verð: 15.000.- Utan búnaðar 

Kynningarkvöld um fjallaskíðamennsku Í samstarfi við Íslenska Alpaklúbbinn: 25 Febrúar kl 20:00 Jökull Bergmann sýnir magnaðar myndir og videó þar sem fjallaskíðamennska er í aðalhlutverki,ásamt því sem fólki gefst tækifæri til að skoða allan þann sérhæfða búnað sem fylgir sportinu og fá ráðleggingar frá eina faglærða fjallaleiðsögumanni landsins. Spennandi tækifæri til þess að kynna sér þetta magnaða sport.  Allur ágóði rennur í viðgerðasjóð vegna endurbóta á Bratta, skála Íslenska Alpaklúbbsins í Botnsúlum sem er kjörin áfangastaður fjallaskíðafólks á suð vestur horninu.Verð: 500.- eða frjáls framlög

Myndakvöld FÍ með Helga Björnssyni jöklafræðingi og Þóru Ellen Þórhallsdóttur líffræðingi sló aðsóknarmet vetrarins en 250 gestir mættu til að hlýða á erindi hjónanna og myndasýningar. Gestir fræddust um eðli jökla, íhuguðu hvort fæddur myndi sá Íslendingur sem fengi að sigla inn í Esjufjöll eftir Breiðamerkurfirði og sátu andaktugir undir fyrirlestri Þóru Ellenar um verðmæti íslensks landslag, sérstöðu þess og ýmsar rannsóknir því tengdar. Hinar sívinsælu kaffiveitingar voru á sínum stað. Sigurvegari í ljósmyndasamkeppni FÍ tók á móti verðlaunum og menn hittu gamla ferðafélaga, treystu vinaböndin og skiptust á skoðunum og fréttum úr heimi fjallaferða og útivistar.

Næsta myndakvöld Ferðafélagsins verður haldið miðvikudaginn 17. febrúar í sal Ferðafélagsins í Mörkinni 6 og hefst kl. 20.00 að vanda. Myndakvöldið er að þessu sinni í umsjá hjónanna Helga Björnssonar jöklafræðings  og Þóru Ellenar Þórhallsdóttur líffræðings.  Páll Ásgeir Ásgeirsson umsjónarmaður myndakvölda FÍ segir afar ánægjulegt að  bjóða upp á myndakvöld með þeim hjónum sem hvort fyrir sig er á meðal fremstu vísindamanna þjóðarinnar á sínu sviði.

Nú hefur dómnefnd skilað inn niðurstöðu í ljósmyndasamkeppni FÍ sem haldin var fyrir áramót.  Vinningsmyndin var tekin í Langadal í Þórsmörk og ljósmyndarinn er Ármann Guðjónsson.  Í texta ljósmyndara með myndinni segir:, ,, Mynd tekin við bústað skálavarða í Langadal 23. ágúst, lítill sætur yrðlingur hvílir sig í sólinni," Í niðurstöðuorðum dómnefndar segir:  "Dómnefnd þótti myndin hafa til að bera það þrennt sem hæfir góðri náttúrumynd; sterka mynduppbyggingu, fallega birtu og hún er tekin á réttu augnabliki. Þá leiðir grunnur fókus (dýptarskerpa) myndarinnar augu áhorfandans beint í auga dýrsins og skapar þannig umsvifalaust tengingu við viðfangsefnið. Þá er tófan táknmynd náttúru Íslands sem eina villta spendýrið á landinu."