Fréttir

Ljóst er að landsmenn verða á faraldsfæti innanlands í sumar.  Fullbókað er nú í fjölmargar sumarleyfisferðir FÍ.  Má þar nefna flestallar Hornstrandaferðir félagsins, sem og ferðir bæði um vesturland og norðurland.  Laugavegurinn og Fimmvörðuháls njóta vinsælda.  Þá er nú orðið fullbókað í ferðir FÍ á Hvannadalshnúk með Haraldi Erni Ólafssyni en um Hvítasunnuhelgiina fara 100 göngugarpar með FÍ á hæsta tind landsins.

Góð þátttaka er í Esjunni alla daga, 5 daga Esjuátaki FÍ sem nú stendur yfir.  Tæplega 30 manns tóku þátt í gönguferðinni í gær á Esjuna í ágætisveðri.  Gengið verður á Esjuna alla daga vikunnar, og hljóta þeir sem taka þátt í öllum gönguferðunum glæsileg verðlaun frá FÍ. Sjá myndir úr gönguferð gærdagsins. 

Ferðafélag Íslands hefur ákveðið að hefja útgáfu tímarits sem dreift verður til allra félagsmanna þeim að kostnaðarlausu. Í tímaritinu sem ætlað er að komi út tvisvar sinnum á ári nánar tiltekið vor og haust verður fjallað um margvíslegt efni sem tengist Ferðafélagi Íslands, starfi þess og viðfangsefnum  sem og ýmsu öðru fróðlegu er tengist útiveru, fjallamennsku og ferðamennsku.

Ferðafélagið stendur fyrir gönguferðum á Esjuna, ,,Esjan alla daga - 8. - 12.mars. "  Þá verður gengið á Esjuna 5 daga í röð. Lagt er af stað kl. 18.  Fararstjóri í ferðunum er Þórður Marelsson. Þátttaka er ókeypis fyrir félagsmenn FÍ en annars kostar kr. 1000 í hverja göngu.  Þeir sem taka þátt í öllum fimm göngunum fá glæsileg verðlaun frá Ferðafélaginu,  árbók FÍ að eigin vali að verðmæti kr. 5000 og dagsferð með FÍ í júní, júlí eða ágúst.

EJS hefur fært Ferðafélagi Íslands öryggisgjallarhorn til notkunar í skála félagsins í Langadal í Þórsmörk.  Gjallarhorn þetta er með sérstaktri öryggissírenu og hentar vel til að ná til ferðamanna úr langri fjarlægð ef á þarf að halda.   Ísar Guðni Arnarson starfsmaður EJS færði framkvæmdastjóra FÍ gjöfina á skrifstofu FÍ á dögunum með þeim óskum að tækið myndi reynast vel í Þórsmörk,  í fjölbreyttu starfi skálavarða þar, sem daglega sinna margvíslegum öryggis- og björgunarstöfum.  Ferðafélag Íslands sendir EJS bestu þakkir fyrir gjöfina.

Fjallaskíðanámskeið með Jökli Bergmann - 26. mars bóklegt, 28. - 29. mars verklegt. Vaðnámskeið í Merkuránum með Gísla Ólafi - 6.-8. mars verkllegt, 4. mars bóklegt. Skyndihjálp 2. apríl Jöklaöryggisnámskeið með Jökli Bergmann 19. mars bóklegt, 22. mars verklegt. Sjá nánar undir ferðir.  

Ferðafélag Íslands stendur fyrir kvöldgöngum á Esjuna ,,Æfing í Esju”  á fimmtudögum.  Lagt er af stað frá bílastæðinu við Mógilsá kl. 18.  Gert er ráð fyrir að ganga taki 2 – 3 klst. Mikilvægt er að hafa góðan búnað, þe góða gönguskó, hlífðarfatnað, húfu og vettlinga og nú á þessum árstíma að hafa með sér höfuðljós.  Fararstjóri í fyrstu ferðinni fimmtudaginn  5. mars verður Ólafur Örn Haraldsson forseti FÍ.  Þátttaka er ókeypis, allir velkomnir.

Ferðafélagið stendur fyrir kvöldgöngum á Ejsuna - Esjan eftir vinnu á fimmtudögum. Lagt er af stað frá bílastæðinu við Mógilsá kl. 18.00 alla fimmtudaga. Fararstjóri frá FÍ leiðir för.  Takið með ykkur nesti og góðan búnað. Í kvöldgöngurnar er mikilvægt að taka með sér höfuðljós. Þátttaka er ókeypis, allir velkomnir.

Nú hefur verið opnaður skiptimarkaður á heimasíðu FÍ á notuðum útivistarbúnaði.  Markmið skiptimarkaðar á vef Ferðafélags Íslands er að skapa vettvang viðskipta með notaðan útivistarbúnað. Þannig gefst fleirum kostur á að stunda útiveru og fjallamennsku án þess miklu þurfi að kosta til. 

Ferðafélagið stendur fyrir gps námskeiði fyrir göngufólk 26. febrúar nk. Haraldur Örn Ólafsson fer yfir helstu atriði í noktun gps.  Skráning á skrifstofu FÍ.