Fréttir

„Færðin á Laugaveginum er góð, leiðin stikuð og greiðfær en þó töluverður snjór í og við Hrafntinnusker,“ segir Þorgerður María Þorbjarnardóttir sem er einn af skálavörðum FÍ í Landmannalaugum.

Árbók FÍ 2018 hefur verið mjög vel tekið. Bókin er mjög umfangsmikil, yfir 500 blaðsíður og rúmlega 500 myndir rituð af Hjörleifi Guttormssyni náttúrufræðingi. Við viljum hvetja félagsmenn sem eiga eftir að greiða árgjaldið að greiða sem fyrst þannig að hægt sé að að senda þeim árbókina og ársskírteinið með öllum þeim fríðindum sem því fylgir.  Allir þeir sem þegar hafa greitt ættu nú að hafa fengið bókina heim eða hún á leiðinni til þeirra með Póstinum í síðasta lagi í lok þessarar viku. 

Skáli FÍ í Hvítárnesi við Hvítárvatn á Kili er einn fallegasti skáli félagsins en jafnframt sá elsti, byggður árið 1930. Húsið er byggt í þjóðlegum, rómantískum anda með svipmóti gamla íslenska torfbæjarins. Unnið er yfirhalningu skálans og koma honum í sína upprunalegu mynd. Síðasta sumar hófust endurbætur á langhliðinni eldhúsmegin og hafist handa við nýjan grjóthleðsluvegg. Nýverið hefur vinnu við vegginn verið haldið áfram, það starf hefur reynst mikið og erfitt en alls hafa farið um 16 tonn af grjóti bara í þessa hlið skálans og allt grjót borið og hlaðið með höndunun.

Gestur okkar að þessu sinni í Áttavitanum, hlaðvarpi Ferðafélags Íslands, er Sigrún Valbergsdóttir sem er einn af þeim fjölmörgu öflugu og hæfileikaríku félagsmönnum sem mynda Ferðafélag Íslands. Sigrún er er fararstjóri, kennari í leiðsöguskólanum, leikstjóri og ekki síst varaforseti Ferðafélags Íslands og formaður ferðanefndar ferðafélagsins.

Mikill fjöldi ferðafélagsmanna hefur komið við hjá okkur á skrifstofu FÍ undanfarið að sækja Árbók FÍ 2018.  Við viljum benda á að enn er hægt að koma við á skrifstofu FÍ til að sækja árbókina.

Ferðafélagshópar eru víða um óbyggðir og til fjalla um þessar mundir. Við ræddum við einn fararstjóra FÍ, Helga Jóhannesson, nýkominn úr góðri ferð á Hornströndum. „Það er frábært að vera í Hornbjargsvita. Við fengum höfðinglegar móttökur hjá feðgunum Dóra og Katli, sem elduðu fyrir okkur og þjónustuðu. Umhverfið þarna er algjörlega dásamlegt,“ segir Helgi sem var með 15 manna hóp í ferðinni.

Á þriðja tug fjallagarpa úr hópi Ferðafélags Íslands héldu á Herðubreið um helgina, en fjallið hefur oft verið nefnd drottning Íslenskra fjalla. Sumir fjallagarpana hafa gengið á fjallið yfir 20 sinnum en aldrei verið eins heppin með útsýni og nú, Tómas Guðbjartsson fararstjóri er einn þeirra, „það var klikkað útsýni og sennilega það besta sem ég hef fengið í mínum 24 ferðum á Herðubreið og 30 ferðum í Kverkfjöll.“

Höfundur nýjustu árbókar FÍ, Hjörleifur Guttormsson, segir merkilega jarðsögu, skóglendi, miklar sögulegar minjar og víðfemar óbyggðir einkenna Upphérað og öræfin suður af.

Páll Guðmundsson framkvæmdastjóri Ferðafélags Íslands og Hilmar Antonsson formaður Ferðafélags Akureyrar áttu í dag fund með nýjum framkvæmdastjóra Vatnajökulsþjóðgarðs, Magnúsi Guðmundssyni. Á fundinum var rætt um samstarf ferðafélagana og þjóðgarðsins.

Oddur Sigurðsson jöklafræðingur á Veðurstofu Íslands kom hjólandi á skrifstofu Ferðafélags Íslands að sækja nýútkomna Árbók F.Í. Það vakti athygli og ánægju starfsmanna að sjá hve margir félagsmanna voru duglegir að koma hjólandi, en áætlað er að um 15-20 manns hafi komið daglega undanfarna daga á reiðhjóli til okkar að sækja árbókina.